Pano Qirko është lojtari më i ri i Partizanit. Portieri ishte afruar në këtë merkato vere dhe kishte nisur përgatitjet me kampionët e Shqipërisë.
Klubi i Teutës doli fillimisht në njoftim për shtyp ku lajmëronte se kishte arritur marrëveshjen vetëm për Europën në formë huazimi.
Ndërsa sot, të kuqtë lajmërojnë se “gardiani” ka firmosur definitivisht kontratën që e lidh me Partizanin për 4 vitet e ardhshme.
“Klubi zyrtarizon arritjen e marrëveshjes me Pano Qirkon. Partizani ka arritur marrëveshjen me Teutën për trasferimin definitiv të portierit 24 vjeçar. Gardiani ka firmosur me kampionët e Shqipërisë një kontratë 4 vjeçare, me opsion rinovimi edhe për një tjetër sezon. Qirko bashkohet me të kuqtë pas eksperiencës shumë pozitive me ekipin e Teutës”, thuhej në njoftimin e klubit të Partizanit.
Kujtojmë që sezonin e shkuar, Pano Qirko ishte një nga më të mirët në fushë për skuadrën e Teutës.
Në edicionin e ri, ai ka zgjedhur të mbrojë ngjyrat e Partizanit.
