Skënderbeu ka filluar fazën përgatitore me stërvitje intensive, për të bërë të mundur rritjen e gjendjes fizike për përballimin e një sezoni të gjatë dhe impenjativ.
Brenda kësaj jave ekipi do të plotësohet nga të gjithë lojtarët që kanë munguar deri më tani, qoftë ata nën kontratë, qoftë afrimet e reja.
Në kushte të tilla, ditën e sotme mbërrin në Korçë portieri Marko Alia, ndërsa po sot pritet që të bashkohet me ekipin edhe mesfushori Nigerian Mario Rabiu.
Ekipi do të kompletohet rreth datës 9 korrik, kohë kur do të mbërrijnë në juglindje edhe Randi Dumfur, Sumaila Abubakar dhe Agnaldo Moraesh, që janë në pritje të dokumentacioneve përkatëse për të qenë pjesë e korçarëve zyrtarisht.
Ndaj edhe për këtë pritet që fillimi i fazës përgatitore të tregojë pak a shumë fytyrën e vërtetë të Skënderbeut të ri.
Përtej përgatitjeve dhe nisjes së fazës përgatitore për sezonin e ri, bardhekuqtë po punojnë edhe për të kompletuar ekipin me elementë të tjerë të domosdoshëm për të ndërtuar një skuadër solide.
Krahu i djathtë i mbrojtjes është ai që për momentin bardhekuqtë e kanë si pikë të padubluar, pasi veç Erlis Frashërit nuk ka në dispozicion asnjë futbollist tjetër në atë rol.
Duket se pistat ku korçarët janë të përqendruar për të bërë afrimin e radhës vijojnë të mbeten dy që prej fillimit të merkatos. I pari në listë është Anteo Osmanllari, që ka një kontratë aktive me Erzenin, por Skënderbeu po e ndjek me kujdes mundësinë për ta risjellë në Korçë maliqarin që ka nisur aventurën e tij sportive me bardhekuqtë.
Osmanllari duket zgjedhja e parë për bardhekuqtë, ndërsa në pritje është edhe versioni i dytë, ai i Andrea Gërxhos, që luan te Fermana në Itali. Pritet që në rast se nuk do të konkretizohet me njërin prej tyre do të bëhet çmos për të sjellë në juglindje lojtarin tjetër.
