Talibanët kanë urdhëruar që sallonet e flokëve dhe bukurisë në Afganistan të mbyllen. Këto janë kufizimet e fundit me të cilat përballen gratë.
Një zëdhënës i Ministrisë së Vesit dhe Virtytit tha që bizneset kanë kohë një muaj për t’u përgatitur për mbyllje duke filluar nga 2 korriku kur ata u informuan për herë të parë për masën.
Liritë e grave janë tkurrur në mënyrë të vazhdueshme që kur talebanët morën pushtetin në vitin 2021.
Ata kanë ndaluar vajzat dhe gratë adoleshente që të shkojnë në shkollë, palestra dhe parqe, dhe së fundmi madje i kanë ndaluar të punojnë për Kombet e Bashkuara.
Talibanët gjithashtu kanë dekretuar që gratë duhet të vishen në një mënyrë që të zbulojnë vetëm sytë dhe duhet të shoqërohen nga një i afërm mashkull nëse ato udhëtojnë më shumë se 72 km.
Kufizimet kanë vazhduar pavarësisht kundërshtimit dhe protestave ndërkombëtare nga gratë, si dhe nga aktivistët që flasin në emër të tyre.
Mbyllja e salloneve të bukurisë ishte pjesë e një game të gjerë masash të vendosura nga talebanët kur ata ishin në pushtet për herë të fundit mes viteve 1996 dhe 2001. Por ato u rihapën në vitet pas pushtimit të Afganistanit të udhëhequr nga SHBA në vitin 2001.
Ato mbetën të hapura edhe pasi talebanët rimorën pushtetin dy vjet më parë pas tërheqjes së forcave amerikane. Por vitrinat e dyqaneve shpesh mbuloheshin dhe imazhet e grave jashtë salloneve ishin lyer me spraj për të fshehur fytyrat e tyre.
Qeveria talebane nuk ka shpjeguar se cila është arsyeja e mbylljes së këtyre bizneseve dhe cilat alternativa, nëse ka, do të ishin në dispozicion për gratë pasi sallonet të mbylleshin./BBC
