Më 23 Korrik, qytetarët e Rrogozhinës do të rivotojnë për zgjedhjen e kryetarit të Bashkisë. Vendimi për caktimin e datës së zgjedhjeve u mor në mbledhjen e kësaj të Marte nga KQZ, pasi Kolegji Zgjedhor vendosi ripërsëritjen e lokaleve të 14 Majit në këtë bashki.
Më 15 Qershor, Kolegji Zgjedhor pranoi pjesërisht kërkesën e koalicionit “Bashkë Fitojmë”, që më herët ishte rrëzuar nga KQZ dhe KAS.
Megjithatë kërkesa kryesore e përfaqësuesve ligjor të koalicionit opozitar ishte ajo e shpalljes së pavlefshme të qendrës së votimit të burgut, çka nëse do të aprovohej, do të sillte në krye të bashkisë kandidatin e “BF”, Shkëlqim Hoxha.
Përfaqësuesit e BF argumentuan se pse sipas tyre rezultati i kutisë së votimit të burgut, e cila ishte e fundit që u numërua dhe që i dha fitoren kandidatit të PS-së Edison Memolla, duhet të mos merrej parasysh. Sipas tyre, kjo qendër votimi ishte ngritur në kundërshtim me dispozitat ligjore dhe ishin lejuar të votonin persona që nuk i lejonte ligji.
Pas përfundimit të shqyrtimit të çështjes, Kolegji vendosi ripërsëritjen e zgjedhjeve në të gjithë bashkinë.
Vendim ky që nuk kënaqi opozitën, kërkesa e së cilës ishte përqendruar në shpalljen të paligjshme të votimit në qendrën e burgut.
“Gjykata, në një vendim të kontrolluar, shpalli të gjithë zonën të pavlefshme për një qendër votimi”, do të deklaronte kreu i PD-së Sali Berisha pas vendimit të Kolegjit Zgjedhor.
Më herët, KAS vendosi rinumërimin e votave për zgjedhjet lokale në Rrogozhinë. Numërimi i zhvillua më 5 qershor dhe rezultati për fituesin nuk ndryshoi, ndërsa diferenca mes kandidatëve u ngushtua, me 21 nga 30 vota. Si përfundim, pas rivlerësimit të votave të vlefshme dhe të pavlefshme, Edison Memollaj i PS grumbulloi 5129 vota, ndërsa Shkëlqim Hoxha i “Bashkë Fitojmë” 5108 vota.
