Atentati me një viktimë që ndodhi një natë më parë në Fush-Krujë, vijon të jetë në sitën e hetimeve, teksa detaje të reja dalin në dritë.
Mbrëmjen e sotme mbi këtë ngjarje ka folur edhe Ish-kryeprokurorja e Tiranës, Elisabeta Imeraj.
E ftuar në emisionin “Open” Imeraj u shpreh se autorët e vrasjes ishin nisur për Gentjan Bejtjen dhe jo për 29-vjeçarin Ramazan Shino, që mbeti i vrarë .
Ajo shtoi se autorët kanë pasur informacione për lëvizjen e shënjestrës së tyre, si edhe për zonën, në të cilën sipas saj është e vështirë për t’u orientuar nëse nuk e njeh.
“Autorët ishin nisur për Gentjan Bejtjen. Plumbat ishin drejtuar ndaj tij. Krimi nuk është matur as për të kursyer fëmijët në këtë rast. Goditja e të miturve lidhet me faktin që objektivi ka qenë aq i qartë sa nuk janë menduar ata që e shoqëronin.
Fakti që Bejtja ka pësuar edhe 2 atentate të tjera dëshmon se ky personazh është vendosur në shënjestër. Lëvizja e autorëve është bërë me mjet të vjedhur dhe duke parë gëzhojat në vendngjarje, kjo është një zonë ku nuk mund të kalohet kollaj pa e njohur vendin përreth. Kanë pasur informacion të mëparshëm për lëvizjet e tij”, u shpreh ajo.
