Komisioneri Publik (IKP) njoftoi këtë të Hënë ankimin e vendimin të Komisionit të Pavarur të Kualifikimit (KPK), që konfirmoi në detyrë Besnik Hoxhën më 18 maj me shumicë votash.
Ankimi në Kolegjin e Posaçëm të Apelimit vjen dy javë pas marrjes së rekomandimit nga Operacioni Ndërkombëtar i Monitorimit që kërkoi shkarkimin nga detyra të gjyqtarit të Tiranës. Sipas vëzhguesve ndërkombëtarë, magjistrati nuk arriti të kundërshtojë barrën e provës për disa gjetje thelbësore si dhe u përpoq që të bënte konfuz Komisionin gjatë hetimit administrativ.
Komisioneri Publik vlerëson se gjyqtari i Tiranës nuk ka arritur të provojë të kundërtën e barrës së provës për të justifikuar me burime të ligjshme një godinë banimi 3-kate në Shkodër dhe një apartament në Tiranë.
Problematika konstatohen nga IKP edhe me justifikimin e shpenzimeve të udhëtimeve të kryera. Sipas IKP, subjekti i rivlerësimit ka kryer deklarim të pasaktë dhe të pamjaftueshëm. Po ashtu, Komisioneri konkludon se Besnik Hoxha nuk ka deklaruar për disa vite përdorimin e një automjeti.
Lidhur me vlerësimin e aftësive profesionale, IKP vlerëson se subjekti ka gjykuar disa çështje me lidhje “të natyrës personale apo interesi me palët në gjykim”, duke “mosrespektuar apo anashkaluar parimet themelore procedurale që synojnë mbrojtjen e paanshmërisë së gjyqësori”.
Në përfundim të analizës, Komisneri Publik shprehet se “subjekti i rivlerësimit gjendet në kushtet e deklarimit të pasaktë dhe të pamjaftueshëm lidhur me mbulimin e shpenzimeve dhe investimeve të kryera ndër vite; ka ndërmarrë veprime dhe është përpjekur për të paraqitur ndryshe rrethanat lidhur me të drejtat e tij pasurore, nuk ka provuar mundësinë financiare të personave të tjerë të lidhur me të”.
“Disponohen informacione nga agjencitë ligjzbatuese të referuar për subjektin e rivlerësimit dhe personat e tjerë të lidhur me të, me të cilët ndërthuren interesat privatë, ka raste të konstatuara të konfliktit të interesit, parë kjo lidhur me etikën dhe sjelljen e magjistratit”, vlerëson IKP.
Në këto kushte, Komisioneri Publik kërkon shkarkimin nga detyra të Besnik Hoxhës.
