Presidenti i Serbisë, Aleksandar Vuçiç ka deklaruar se nuk beson se kryeministri i Shqipërisë, Edi Rama, ka thënë se Ballkani i Hapur e ka kryer misionin e vet dhe se tashmë duhet vazhduar me Procesin e Berlinit.
Vuçiç është shprehur kundër asaj që tha kreu i qeverisë shqiptare se “duhet të futemi me kokë tani në Procesin e Berlinit” dhe ka shtuar më tej se shpreson që së shpejti do ta takojë kryeministrin Rama.
“Nuk besoj se Rama e ka thënë këtë. Shpresoj të kem mundësi ta shoh së shpejti. Ballkani i Hapur është një ide autonome dhe autoktone e njerëzve nga Ballkani”, tha Vuçiç në TV Prva.
Vuçiç ka deklaruar se do të konsiderojë gjithmonë se çdo ide e krijuar në rajon është “më e mirë se ato që vijnë nga jashtë”.
“Kjo është shprehje e dëshirave dhe marrëdhënieve tona, jo diçka që e bëjmë nën sundimin e dikujt tjetër”, tha presidenti serb.
Kryeministri i Shqipërisë, Edi Rama tha dje nga Ulqini se nisma “Ballkani i Hapur” e ka përfunduar misionin për të cilin ka lindur, e që tha se ka qenë për ta shtyrë përpara Procesin e Berlinit.
