Emri i Harry Kane në “listën e dëshirave” të Bajernit për të përforcuar ekipin në sezonin e ri ka marrë linjën e një “misioni të pamundur”, bazuar në raportimet e fundit nga Ishulli. Konkretisht “The Athletic” pohon se presidenti i Totenhemit, Daniel Levi, është i vendosur të refuzojë çdo ofertë në adresim të bomberit Kejn.
Madje, prononcimi shkon më tej, aq sa bosi i “gjelave” të Londrës është i gatshëm t’i thotë “jo” edhe ofertës së re që pritet të mbërrijë në zyrën e 61-vjeçarit, plotë 93 milionë euro, kuotë e cila do të shënonte rekord në historinë e klubit më të titulluar në tokën gjermane.
Çmenduria e Levit arrin majat, sa diskutohet se është i gatshëm ta nisë sezonin e ri me 29-vjeçarin edhe nëse nuk bien dakord për të nënshkruan kontratë të re. Vera e vitit të ardhshëm mund të rezultojë fatale, pasi goleadori i “tre luanëve” është i lirë të shkojë në çdo drejtim profesional, pra i skadon kontrata me Totenhemin.
DËSHIRA E KEJNIT- U përfol në mediat pranë kampionëve të Bundesligës se futbollisti me numër “10” në “Tottenham Hotspur Stadium” do të ndikonte pozitivisht në “lobimin” pro kalimit te rekordmenët, por “The Athletic” nuk bie dakord me këtë qëndrim. Burimi në fjalë shton se Kejn e ka marrë “me nge” dhe s’ka kryer asnjë hap konkret për t’i rritu dozat e presionit te bordi.
OPSIONI OSIMHEN- Është e dukshme se dëshira e Tuhelit përkon me Herri Kejn, por një personazh me shumë ndikim në “Allianz Arena”, jo vetëm në letër, Uli Hënes mbart tjetër alternativë.72-vjeçari i admiron cilësitë e shtatlartit nigerian në radhët e Napolit. Por detaji më interesant vjen nga mediat italiane.
“Gazzetta Dello Sport”, cek se Viktor Osimhen është duke pritur ofensivën e Bajernit, pasi ai e mendon ngjitje në një tjetër dimension te 33 herë triumfuesit e ligës gjermane.
Futbolli gjerman nuk është terr i pashkelur në aventurën profesionale të 24-vjeçarit, i aktivizuar me Volfsburgun mes viteve 2017- 2019, përpara se të kalonte te francezët e Lilë.
“Bild” i mëshon fortë idesë se drejtuesit e bavarezëve janë të gatshëm të shpenzojë më tepër se 100 milionë euro në hipotekimin e kryeshënuesit në Serinë A përgjatë ciklit 2022-2023 me napolitanët.
Vete presidenti Aurelio de Laurentis kërkon të paktën 150 milionë euro në pranimin e zhvendosjes së lojtarit kryesor në ekip. Megjithatë, këmbëngulja e Osimhenit mund të luajë rol përcaktues në uljet e këtyre pretendimeve sporadike dhe gjetjen e gjuhës së përbashkët me Bajernin.
