Kolegji Zgjedhor ka vendosur të rrëzojë ankimimin e koalicionit “Bashkë Fitojmë” për Kuçovën.
Pas përfundimit të rinumërimit të kutive në Bashkinë e Kuçovës, Lefter Maliqi në një komunikim për mediat, e cilësoi vendimin e Kolegjit Zgjedhor, një vendim politik.
“Në vjeshtë më kandidat tjetër. E dini shumë mirë që me këtë kandidat ishte e pamundur. Votim afrikan në Kuçovë, e patë shumë mirë, ndërsa Kodi Zgjedhor thotë vota është e fshehtë, procesverbalet mungonin, pra yrra burra votoni se partia shtet e di vetë se kë nxjerr.,. Unë do vazhdoj betejat politike për t’i kthyer dinjitet qytetarëve të Kuçovë. Qeveritarët duhet ti kapësh si Gjici me provë, me presh në dorë, në gojë. Edhe ky Hajdari si ai ishte, nuk ka prova por e di gjithë Kuçova”, tha Maliqi.
Sot u bë rinumërimi për 18 kutitë e bashkisë Kuçovë, proces që nisi pas kërkesës së koalicionit “Bashkë Fitojmë” për rivlerësim të votave dhe shpalljen e pavlefshmërisë së zgjedhjeve në këtë bashki.
Pas rinumërimit të 18 kutive për Bashkinë Kuçovë, kanë ndryshuar rezultatet e votave. Kandidati i PS-së Kreshnik Hajdari vazhdon të mbetet Kryetar i Bashkisë.
Partia Socialiste ka 9 vota më pak se çfarë është shkruar në proces verbal. Sakaq koalicioni “Bashkë Fitojmë”, ka vetëm 4 vota më pak dhe Partia Demokratike 2 më pak.
Gjatë procesit ndodhi dhe një ndërprerje e rinumërimit për shkak të tensioneve mes kandidatit të koalicionit ‘Bashkë Fitojmë’, Lefter Maliqi dhe sekretarit të përgjithshëm të KQZ-së Ylli Merkaj.
