Një pikë kontrolli është instaluar pranë kampit të muxhahedinëve të “MEK” në Manzë nga policia, që prej orëve të mbrëmjes së kaluar kanë nisur edhe veprimet për kontrollin kryesisht të automjeteve që futen dhe dalin nga kampi.
Pika e kontrollit thonë burime policor, do të jetë e instaluar të paktën deri në muajin gusht, ndërsa ky veprim vjen pas ngjarjeve të disa ditëve më parë, ku me urdhër të SPAK u bënë kontrolle dhe sekuestrime, në një aksion që shkaktoi edhe tensione mes policisë dhe banorëve.
Dyshimet se anëtarët e MEK që strehohen në Manzë qëndrojnë pas sulmeve kibernetike ndaj institucioneve të Iranit dhe se janë përfshirë në aktivitete terroriste është argumenti që SPAK paraqiti në gjykatë, në kërkesën për kontroll në kampin “Arshaf 3”.
Kontrollet e fundit kanë shkaktuar indinjim te banorët, por deri tani nuk raportohet për ndonjë incident.
