Grabiten me armë rreth 40 mijë euro në një pikë transfertash parash në Tiranë |

Një grabitje e një shume të madhe parash është regjistruar mëngjesin e kësaj të shtunë në Tiranë, në zonën e Unazës së Re në Astir.

Autoritet konfirmojnë se një person, ende i paidentifikuar, ka grabitur nën kërcënimin e armës një pikë transfertash parash dhe këmbimi valutor. Blutë e kryeqytetit nuk e bëjnë me dije shumën e grabitur, por burime bëjnë me dije se autori ka marrë rreth 40 mijë euro.

renda “Exchange-t” kanë qenë dy punonjëse, të cilat nën kërcënimin e armës kanë hapur sirtarët ku mbanin paratë. Autori ka qenë i maskuar me një maskë anti-covid dhe është larguar pas grabitjes me shpejtësi me një biçikletë.

Ngjarja ka ndodhur rreth orës 08:25, në rrugën “Tom Plezha”. Grupi hetimor ndodhet në vendngjarje dhe po punon për identifikimin dhe kapjen e autorit.

Policia e Tiranës ka vendosur një shpërblim prej 5 mijë eurosh për këdo që jep një informacion të vlefshëm për kapjen e autorit të grabitjes. Blutë e kryeqytetit kanë vendosur numrin e telefonit 0694110415, për këdo person që ka informacion për autorin, teksa garanton anonimatin e plotë të çdo telefonuesi.

Gjithashtu, është publikuar me video edhe momenti i grabitjes. Siç shihet, autori sapo gjen derën e Exchange hapur, hyn me shpejtësi brenda ku ishin dy punonjëse, dhe pasi i kërcënon ato dhe shtyn njërën prej tyre, merr disa para dhe i fsheh në trup.

Ndërkohë, duke i kërcënuar me armë, ai kontrollon sirtarët për të tjera para, ndërsa një prej vajzave ulet përtokë e tmerruar. Pasi merr paratë, autori, që është veshur me kostum të zi dhe në fytyrë mban një maskë anti-covidi, largohet me shpejtësi nga vendngjarja.

Njoftimi:

Më datë 24.06.2023, rreth orës 08:25, në rrugën “Tom Plezha” në Unazë të Re, një person ende i paidentifikuar, i cili mbante një send të dyshuar si armë zjarri, është futur në një pikë për transferta parash dhe këmbimi valutor, ka marrë një shumë parash dhe është larguar me një biçikletë.