Kryeministri Edi Rama duket se kërkon të marrë vëmendje maksimale në tensionet Kosovë Serbi, që në fund të dalë si “heroi” për rregullimin e marrëdhënieve mes dy shteteve.
Në një konferencë me gazetarët, Rama i bëri dhe një herë apel president serb Aleksandër Vuçiç që të lirojë 3 policët kosovarë. Ai foli për një letër që i ka dërguar presidentit francez, Emmanuel Macron dhe kancelarit gjerman Olaf Scholz, ku iu ka kërkuar që të shtyjnë për zbatimin e planit franko-gjerman.
“Mbajtja e 3 policëve me ditë të tëra në burg është e pajustifikueshme dhe është e papranueshme. Përpjekja për ta mbuluar këtë lajthitje shtetërore për mbajtjejn pa asnjë të drejtë të tre policëve të huaj në burgun e 3 policëve të një shteti tjetër duke ngritur zërin për 3 të arrestuar në veri të Kosovës, është e papranueshme. Nëse Serbia ka pretendime, për arrestime arbitrare për arrestimet të qytetarëve në veri të Kosovës, këto arrestime nuk pengohen duke mbajtur peng policët e Kosovës. Këto zgjidhen me ndërkombëtarët, me KFOR e EULEX. Marrëdhënia duhet normalizuar, marrëveshja do duhet finalizuar. E përsëris apelin për lirimin e menjëhershëm pa kushte për 3 policët në veri të Kosovës jo vetëm se është shkelje e të drejtave të njeriut, por sepse pa u kthyer në shtëpi ata 3 burra s’ka hapësirë për të lëvizur me planin e deskalimit.
Dua t’iu informoj se pardje i kam nisur një letër të dytë, pas asaj të draft-statutit presidentit Macron dhe kancelarit Scholz, për dijeni edhe presidentit të Këshillit Europian Charles Michel lidhur me domosdoshmërinë e një shtyse të re, konkrete, të Francës dhe Gjermanisë si kumbarët e planit franko-gjerman, natyrisht me mbështetjen e Shteteve të Bashkuara në mënyrë që plani franko-gjerman të zbatohet me doemos,” – u shpreh Rama.
Sipas Ramës nuk mund të ketë normalitet as në marrëdhëniet mes Shqipërisë dhe Serbisë në këto kushte.
“Edhe nëse e kanë kaluar vijën e kufirit, sikur ta marrim të mirëqenë këtë pretendim dihet botërisht se në çdo legjislacion demokratik për kalim të paligjshëm të kufirit njerëzit arrestohen, pyeten dhe kthehen mbrapsht me masën e ndalimit të hyrjes në atë vend për një kohë të caktuar. Mbajtja e tyre me ditë të tëra në burg është e pajustifikueshme dhe është e papranueshme.
Përpjekja për ta mbuluar këtë lajthitje shtetërore për mbajtjen pas asnjë të drejtë të tre policëve të huaj në burgun e një shteti tjetër, duke ngritur zërin për arrestimet në veri të individëve të caktuar, të minoritetit serb nga forcat policore të Kosovës është tejet shqetësuese sepse shtetet demokratike nuk i përgjigjen kurrë në mënyrë simetrike shkeljeve të pretenduara të bashkëkombasve në një shtet tjetër,” – u shpreh Rama.
Kreu i qeverisë shqiptare shtoi më tej se retorika e udhëheqësve të Kosovës dhe Serbisë, po e çojnë veriun drejt një përplasjeje të armatosur mes grupeve serbe dhe forcave speciale të policisë së Kosovës, Ai tha se nëse ndodhte një konflikt i armatosur qoftë për 3 orë, atëherë i gjithë rajoni i Ballkanit do të bënte shumë hapa mbrapa.
“Jemi në kushtet ku degradimi i situatës në Veri ku përplasjet mes dy udhëheqësve po e rrit me orë rrezikun serioz të një përplasje fatale të armatosur, mes grupeve që operojnë në veriun e Kosovës dhe forave të sigurisë, çka do të ishte një katastrofë që do të përfshihej në mes të të cilës dhe KFOR-i.
Përplasje që edhe sikur 3 orë të zgjste, jo më 3 ditë apo 3 javë, do të rezultonte fatale për gjithçka që është bërë këto vite, me përpjekje dhe nisma në Ballkanin Perëndimor nën ombrellën e Procesit të Berlinit. Një kthim dramatik për të gjithë të ardhmen e rajonit, që nuk mund të bëhen peng i lojës politike për elektrat as të atyre në Kosovë, as të atyre në Serbi. Vendet tona dhe popujt tanë në të gjithë Ballkanin kanë një moment krejt tjetër dhe një rrugë krejt tjetër nga kjo që adreson qorrsokaku i Veriut”, tha Rama.
