Kreu i Partisë Demokratike, Sali Berisha ka deklaruar gjatë konferencës me gazetarët se do të krijojnë një front të gjerë opozitar për të kryer misionin e zhvillimit të protestave. Berisha garantoi se po bashkëpunon me Ilir Metën, duke theksuar se janë të palëkundur për rikthimin e votës.
“Po të garantoj që po bashkëpunoj dhe Ilir Meta është jashtëzakonisht entuziast për detyrimin që ka opozita për rikthimin e votës. PL mbetet e palëkundur. Ju garantoj që do krijojmë frontin më të madh opozitar dhe ta ta kryejmë këtë mision”, tha Berisha.
Ndërsa i pyetur nëse në këtë front opozitar do të jetë edhe Lulzim Basha, Berisha ktheu një përgjigje ironizuese.
Pyetje: Ju thatë që do krijojmë frontin më të gjerë opozitar. A do jetë Basha pjesë e këtij fronti?
Berisha: Ti po më pyet a mund të jetë Balla në frontin opozitar? Mos bëj shaka! Ça pune ka Lulzim Brava me opozitën?
Gjithashtu, duket se ai ka ndërprerë përfundimisht marrëdhëniet edhe me Evi Kokalarin, ku deklaroi se nuk e ka më një bashkëpunëtore.
Pyetje: Evi Kokalari ka thënë se do bëjë një parti për zgjedhjet e 2025.
Berisha: Unë jam këtu për të komentuar për realitetet aktuale. E vërteta është që ajo nuk është më një bashkëpunëtore.
