Komisioni Qendror i Zgjedhjeve ka propozuar datën 23 korrik për të mbajtur zgjedhjet lokale në Bashkinë e Rrogozhinës.
Kolegji Zgjedhor vendosi ripërsëritjen e zgjedhjeve në Bashkinë e Rrogozhinës, pas ankimit nga ana e koalicionit “Bashkë Fitojmë” në lidhje me parregullsitë me kutinë e burgut, e cila i dha fitoren kandidatit socialist Edison Memolla më 14 Maj. Vendimi përfundimtar i KQZ pritet të merret ditën e hënë.
Pas rinumërimit të votave të disa kutive nga ana e KAS për Bashkinë e Rrogozhinës, kandidati i PS-së Edison Memolla rezulton fitues me 5129 , ndërsa kandidati i koalicionit “Bashkë Fitojmë”, Shkëlqim Hoxha me 5108, pra vetëm 21 vota diferencë. Ndërkohë, në rezultatin fillestar të KQZ-së, Memolla rezultonte më parë me 5133 vota, ndërsa Hoxha me 5103 vota.
Nuk dihet ende nëse në Bashkinë e Rrogozhinës do të zhvillohen zgjedhjet në të njëjtën ditë me atë të Kukësit pas dorëheqjes së kryebashkiakut Safet Gjici, pasi tek kjo e fundit është institucioni i Presidencë ai që e shpall datën e zgjedhjeve.
Gjici dha dorëheqjen pas publikimit të një video-skandali ku shfaqej duke kryer marrëdhënie seksuale me një vajzë, Alma K. në zyrën e tij, teksa në këmbim i premtoi projektin për sterilizimin e qenëve.
