Ish-ministri i Drejtësisë, Ylli Manjani ka reaguar në lidhje me konferencën për shtyp të mbajtur nga Yuri Kim, e fundit për postin si ambasadore e ShBA-ve në Tiranë.
Në një postim në rrjetet sociale, Manjani shkruan se “udha e mbarë i qoftë”, pasi sipas tij, Yuri Kim nuk do t’i mungojë fare Shqipërisë. Më tej, ai thekson se e largimi i Kim nuk zgjidh thelbin e problemit; përdorimin politik të ambasadës nga ana e qeverisë.
Manjani deklaron se dikush duhet t’u a heqë “mandatin” absurd që u është dhënë amerikanllëqeve në Shqipëri, që sipas tij, i kalon përmasat e një ambasadori.
Reagimi i plotë:
Yurit udha e mbarë i qoftë, se na e hapi barkun më shumë se çdo ambasador tjetër në këtë vend!
Nuk do na mungojë hiç!
Por largimi i saj, nuk zgjidh thelbin e problemit: përdorimin politik të ambasadës nga ana e qeverisë.
Ambasadori ka një rol personal padyshim dhe Yuri ishte ekstremisht e përfshirë me punët e pushtetit politik në Shqipëri. Por mandati absurd që i është dhënë amerikanllëqeve në këtë vend i kalon përmasat e ambasadorit.
Këtë “mandat” disi, dikush duhet ta heqë.
Në radhë të parë populli shqiptar duhet të kuptojë se problemet e tij nuk i zgjidh asnjë ambasadë apo qeveri e huaj.
Asnjë ambasadë apo qeveri e huaj nuk do na bëjë ne shtetin as ligjin.
Duhet të kuptojmë të gjithë se loja me ambasadorë është lojë pushteti politik dhe jo rruga drejt shtetit të drejtë, demokracisë, ekonomisë së lirë dhe mirqenies.
Asnjë ambasador, as qeverie të huaj, nuk i plas fare, po fare fare për shtetin, demokracinë ekonominë e mirqenien tonë. Ata i shërbejnë thjesht interesave të shteteve të veta.
Nëse nuk kuptojmë kaq gjë, se ikën Yuri e vjen Yuri tjetër, s’ka asnjë dallim.
