Tre persona janë arrestuar në Korçë, pasi në bashkëpunim me njëri-tjetrin ushtronin veprimtarinë kriminale të prodhimit dhe shitjes së narkotikëve.
Mësohet se shtetasit Donald Lato 24 vjeç; Klevis Zaçellari 20 vjeç dhe Luan Qazimi 38 vjeç kultivonin kanabis në banesat të tyre ku gjatë kontrollit të policisë i është sekuestruar 2 armë gjahu dhe 2 tyta çifteje.
“Specialistët për Hetimin e Trafiqeve të Paligjshme dhe Narkotikëve të DVP Korçë, në bashkëpunim me Komisariatin e Policisë Korçë, në vijim të punës së pandërprerë për goditjen e aktiviteteve kriminale të prodhimit dhe shitjes së lëndëve narkotike, armëmbajtjes pa leje dhe kultivimit të bimëve narkotike, pas një hetimi 2-mujor me metoda proaktive, në drejtimin e Prokurorisë, organizuan dhe finalizuan me sukses operacionin policor të koduar “Denasi”.
Si rezultat i këtij operacioni u kapën dhe u arrestuan në flagrancë shtetasit:
-D. L., 24 vjeç; K. Z., 20 vjeç, të dy banues në fshatin Gjonomadh, Korçë dhe L. Q., 38 vjeç, banues në fshatin Denas, Korçë.
Në bazë të informacioneve të siguruara nga inteligjenca informative se këta shtetas, në bashkëpunim me njëri-tjetrin, ushtronin veprimtarinë kriminale të prodhimit dhe shitjes së narkotikëve, shërbimet policore kanë ushtruar kontroll në banesat e tyre, në fshatrat Gjonomadh dhe Denas. Gjatë kontrolleve në të trija banesat, u gjetën sasi lënde të dyshuara narkotike kanabis. Gjithashtu, në afërsi të banesës së shtetasit D. L., u gjetën të kultivuar fidanë kanabis, ndërsa gjatë kontrollit në banesën e shtetasit K. Z., u gjetën 2 armë gjahu dhe 2 tyta çifteje.
Lënda narkotike dhe armët e gjahut u sekuestruan në cilësinë e provës materiale, ndërsa fidanët narkotikë, pas kryerjes së veprimeve procedurale, u asgjësuan nëpërmjet djegies.”– njofton policia.
Vijon puna për identifikimin dhe vënien para përgjegjësisë penale të shtetasve të tjerë të implikuar në këtë veprimtari kriminale.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.
