Vdekja e 35 vjeçarit, Arbër Ferati, në Vlorë ka shkaktuar përplasje dhe tensione mes familjarëve dhe policisë.
Ferati ra në kontakt me rrymën elektrike teksa ishte duke punuar tokën me një autokombanjë dhe është transportuar me ambulancë drejt spitalit, po nuk ka mundur të mbijetojë.
Familjarët shprehen se i riu ka vdekur në ambjentet e jashtme të spitalit teksa ndodhej brenda ambulancës pasi dera e kësaj të fundit nuk hapej.
Tentativa për të hapur derën e autoambulancës së amortizuar ka zgjatur për disa minuta dhe kjo ka sjellë irritim tek të afërmit e 35-vjeçarit.
Irritimi i tyre edhe me ndërhyrjen e bluzave të bardha dhe policisë për të qetësuar situatën ka degraduar në përdorim të dhunës fizike mes njëri tjetrit.
Pas situatës së krijuar policia ka shoqëruar në komisariat një prej familjarëve të Feratit.
35-vjeçari Arbër Ferati është përcjellë sot për në banesën e fundit.
