Nga Boldnews.al
Kompania shtetërore naftë nxjerrëse, Albpetrol është kthyer së fundmi në një oaz për shumë militantë të mazhorancës, disa prej të cilëve edhe nën hetim dhe të arrestuar për shpërdorim detyre. Megjithatë, shumë të tjerë e kanë përdorur, aq sa disa kanë qenë drejtorë dhe të afërm të tyre kanë krijuar firma private, të cilët kanë marrë tendera.
Madje, në krye të Albpetrolit janë emëruar edhe ish-këshilltarë të koncesionarit Bankers Petrolium, të cilët pasi e kanë vjelë janë shkarkuar. Së fundmi, në krye është emëruar z.Eltar Deda, një funksionar që ka ardhur nga Tirana, me “urdhër” të Ballukut dhe me miratim të Taulant Ballës, i cili është edhe i dërguari politik i PS-së për rrethin e Fierit.
Dhe, me këtë mbështetje të madhe nga eksponentë të mazhorancës, drejtori Eltar Deda ka “dorë të lirë”, aq sa bën tendera edhe për të blerë naftë bruto për kaldajat. Ironia në këtë rast është se kompania që nxjerr mijëra ton naftë bruto, bën vetë tender për të blerë naftë. Dhe kjo, me çmimet e tregut, megjithëse nafta është për kaldajat.
Sipas dokumenteve që disponon BoldNews.al, drejtori Eltar Deda ka firmosur për tenderin me objekt “blerje lëndë djegëse e lëngët për përdorim teknik dhe industrial (për kaldajat). Autoriteti kontraktues është “Sh.A Albpetrol” dhe burimi i financimit është nga fondet e vetë kompanisë. Fondi limit i kësaj procedure është 40.000.000 lekë, ndërsa në shpjegimet e mëtejshme kërkohet që të blihen “produkte të naftës, lëndë djegëse, energji elektrike dhe burime të tjera të energjisë”. Por, ajo që cituam më sipër është se, vetë kompania që nxjerr naftë, blen vetë naftë bruto, me një çmim marramendës.
Megjithatë, duke kontrolluar Këshillin Mbikëqyrës apo institucionet e tjera, vihet re se kryetari i këtij këshilli është Evis Berberi, kreu aktual i Autoritetit Rrugor Shqiptar. Ndërkohë që aksionere me 100% të aksioneve të kësaj shoqërie është Ministria e Energjisë dhe Industrisë. Pra, vetë Belinda Balluku, e cila kontrollon drejtorin e Albpetrol dhe këshillin, nëpërmjet Evis Berberit.
