Është kthyer në një debat procedurial, seanca e sotme e konkluzioneve të mbrojtjes për inceneratorin e Fierit.
Ish-sekretari i Përgjithshëm i Ministrisë së Mjedisit, Alqi Bllako, për të cilin SPAK ka kërkuar 7 vite burg, pretendon se nuk ka qenë zyrtar i lartë publik, por funksionar i lartë civil. Ai ka paralajmëruar se shkeljet e konstatuara do t’i ankimojë në KLP dhe deri në Strasburg.
“Shkelja e ligjit është aq flagrante se nuk di nëse ka të bëjë me injorancën profesionale apo një hakmarrje personale. Vetëm SPAK mund të akuzojë për një detyrë që nuk ka qenë detyra ime. Standard i hapur esktraligjor, duke çuar përpara një axhendë hakmarrjeje personale ndaj personit tim. Kush konsiderohet funksionar i lartë shtetëror e përcakton Kushtetuta. E ftova prokurorin në seancën paraprake të citonte një ligj të vetëm se ku bazohet, nuk dha sqarime sepse diçka e tillë nuk ekziston. Është njësoj si gjykata të çojë për gjykim çështjen me akuzën shpërdorim detyre, ndërsa në konkluzionet përfundimtare prokuroria të ngrejë akuzën vrasje me paramendim. Është haptazi shpërdorimi i prokurorit, me qëllim hakmarrjen personale. Një atentat ndaj gjykatës paraprake. Një shkelje e tillë jo vetëm do ankimohet në KLP, por deri në Strasburg”, ka thënë Bllako.
Kujtojmë se Alqi Bllako dhe ish-ministri i Mjedisit, Lefter Koka, janë dy zyrtarët e vetëm të lartë, të cilët ndodhen në burg për një mega-aferë si ajo e inceneratorëve. Administratët e kompanive që kanë fituar koncesionet janë ende në kërkim.
