Përçarja mes demokratëve në PD e vulës sa vjen e thellohet.
Lidhur me zhvillimet e fundit në studion e lajmeve në Ora News” ishte këtë të hënë deputeti demokrat Luan Baçi.
“Ajo çfarë po ndodh në Partinë Demokratike është një teatër absurd. Pasi Partia Demokratike dihet kush është (nënkupton atë pjesë që drejtohet nga Sali Berisha), që ka struktura të ngritura, ajo që pati më 14 maj, pavarësisht atij rezultati, një përfaqësim dinjitoz, edhe pse e sulmura fuqishëm dhe duke ia mohuar të gjitha të drejtat.
Ndërsa kjo që thoni ju që i themi si PD-ja zyrtare i pati të gjitha të drejtat që ligji i jep një partie politike, por që në fakt i mori padrejtësisht, nga një grupim i vogël drejtuesish dhe me një farsë elektorale me disa kandidatë paterica që nxori në 10 apo 12 bashki. Unë do ta shikoja edhe këtë zhvillim të fundit një zgjatje të kësaj komedie, por dhe një zgjatje e kësaj agonie për vetë PD-në, një ndihmë që po i jepet përsëri Edi Ramës për të qenë në pushtet sa më gjatë dhe për të pasur një opozitë fallco.
Sa për qëndrimet dhe deklaratën e z. Bardhi e dëgjova me kujdes dhe parimisht jam plotësisht dakort me respektimin e Statutit të PD-së. Por problemi është që ai statut që thotë z. Bardhi për t’u respektuar nuk ekziston. Kjo për arsyen se nuk ka struktura. Madje më konsekuent është ai grupi i Bashës që thotë nuk ka nevojë të mblidhet Këshilli Kombëtar, sepse nuk kanë Këshill Kombëtar që ekziston. Por edhe ata anëtarë kryesie që pretendojnë të mblidhen sërish në 80 për qind të saj sërish nuk janë më anëtarë të Kryesisë së PD-së, dhe kanë krijuar një kryesi me emrat që ata kanë dashur.
Pra, këta të Bashës janë shumë më të sinqertë dhe i tregojnë elektoratit që do bëjnë një farsë ku do bëjnë sikur po zgjedhin një kryetar, dhe zgjedhin përsëri Bashën që ka qenë kryetar dhe që u largua nga kryetar de facto por nuk iku nga kryetar de juro dhe të vazhdojnë përsëri lojën e Ramës për të konfirmuar edhe njëherë Bashën në zgjedhjet e korriku, kur ata e kanë vendosur datën.
Në këtë kuptim mendoj se kjo është një komedi dhe paturpësi që vazhdojnë me këtë lojë. Nëse duan të mirën e PD-së dhe demokratëve, ata janë në bazë, demokratët janë aty te PD-ja, bashkohen të gjithë bashkë.Deputetët e PD-së janë 52 dhe janë ata që kanë marrë mandatin nga lista e 25 prillit të vitit 2021 dhe kanë detyrimin t’u përgjigjen shumicës së demokratëve kur ata vendosin dhe ndërmarrin vendimmarrje. Përdorimi i kartonit të deputetit si një mandat politik që nuk ia heq dot më mandatin brenda 4 vitesh, kjo është ajo që po e dëmton PD-në dhe është abuzuese.Nuk ka përçarje, atje ka një përçarje të grupeve të deputetëve për të qenë dakort për të uzurpuar vulën dhe siglën e PD-së.
Pra, lufta po bëhet se kush do mbajë vulën dhe siglën aty, të cilat shihen si pasuri vetjake të tyre.Por që në fakt ato janë pasuri e demokratëve dhe jo të një pjese deputetësh që e shikojnë këtë si një pasuri që do ta kenë edhe më vonë, për arsyen se u jep të drejtën që në zgjedhjet e ardhshme të kenë financat që u jep buxheti i shtetit, pavarësisht se nuk kanë përfaqësimin e duhur politik. Pra, ata e shikojnë këtë në formën e biznesit, jo si pasuri të demokratëve.Dhe këtë më shumë se të tjerët e shikon Lulzim Basha me të tijët, të cilët nuk e kanë parë asnjëherë si forcë politike, por si biznes fitimprurës PD-në. Ndaj nuk u intereson më numri i ndjekësve të partisë së tyre”, u shpreh Luan Baçi.
Deputeti demokrat në vijim theksoi se formula e vetme për bashkimin e demokratëve është vetëm vota.
