Kryeministri Edi Rama ka avancuar me nismën e kanabisit mjekësor, duke miratuar në mbledhjen e djeshme të qeverise një projektligj që i hap rrugë kultivimit të bimës narkotike “për qëllime mjekësore”. Nisma është kundërshtuar nga opozita që e cilëson ligjërim të një aktiviteti kriminal.
Ministrja e Shëndetësisë, Ogerta Manastirliu njoftoi pas mbledhjes së djeshme të qeverisë legalizimin e projektligjit për kultivimin e kanabisit për qëllime mjekësore.
“Qeveria ka miratuar projektligjin për kontrollin e kultivimit dhe përpunimit të bimës së kanabisit kanabisin dhe prodhimit të nënprodukteve të saj për qëllime mjekësore dhe industriale. Nga Këshilli Kombëtar, ku 61% e qytetarëve u shprehën pro, ka filluar puna nga disa ministri. Ky projektligj është depozituar nga Ministria e shëndetësisë, Bujqësisë dhe e Brendshme dhe përcakton kuadrin rregullator për mënyrën se si do iniciohet procesi për kontrollin e kultivimit dhe përpunimit të bimës së kanabisit dhe prodhimit të nënproduketeve të saj. Qëllimi i këtij projektligji është rregullimi dhe granatimi i procesit të kontrollit dhe mbikëqyrjes së Kultivimit, prodhimin, përpunimit dhe eksportimit”, tha ministrja.
Nisma është parë me skepticizëm nga ekspertë të fushës së sigurisë si dhe opozita. Pasi Rama do të hidhte publikisht sinjalet e parë për ligjërimin e kultivimit të bimës narkotike, kryedemokrati Sali Berisha mbajti një konferencë ku do të shpjegonte argumentet kundër nismës, duke paralajmëruar një sërë efektesh negative. Berisha listoi se me këtë vendim rrezikohet hapja e negociatave, pastrimi i parave kriminale, zëvendësimi i kulturave bujqësore me kanabisin, drogimi masiv i të rinjve, etj.
Një qëndrim të ngjashëm PD mbajti edhe këtë të Shtunë, një ditë pas miratimit të projektligjit nga qeveria. Ish-ministri i Brendshëm Flamur Noka u shpreh se “legalizimi i kanabisit nuk është asgjë më shumë se legalizimi i një sektori kriminal në të cilin qeveria ka qenë e angazhuar që në fillim”.
“Baronët e drogës tani do të legjitimohen dhe, nga industria e kanabasit do të kalojnë në faramaceutikë, e më pas në politikë. Ky projektligj nuk është gjë tjetër veçse përpjekja për ta tomdoshëzuar politikën shqiptare. Nuk është gjë tjetër veçse përmbushja e premtimit të Edi Ramës për padrinon e tij George Soros”, deklaroi Noka nga selia blu.
Ai shtoi se legalizimi i kanabisit është një eksperiment i dështuar në vende të tjera, dhe duke ditur kapacitetet tona dhe korrupsionin e zinxhirit shtetëror, Edi Rama inauguron në Shqipëri Republikën e Kanabisit.
Në fund të deklaratës, apeloi kolegët socialistë që të mos e mbështesin nismën. Një thirrje e vështirë të gjejë zbatim, pasi deputetët nën Ramën e kanë treguar se edhe nëse nuk janë dakord me idetë e tij, për ti dalë kundër liderit është thuajse një mision i pamundur.
