Dy aksidente me pasoja fatale kanë ndodhur këtë të Premte në vend.
Aksidenti i parë u regjistrua mëngjesin e sotëm në rrugën dytësore Tiranë-Durrës, ku një mjet tip ‘BMW X5’ ka humbur kontrollin dhe është përplasur me mbajtësen anësore të rrugës. Si pasojë ka humbur jetën shtetasi Visar Meshi 35-vjeç dhe janë plagosur dy të tjerë, Ensid Hasanllari dhe Erenik Cakraj.
Dy të plagosurit janë transportuar në spital, ku po marrin ndihmë mjekësore, dhe raportohet se janë jashtë rrezikut për jetën.
“Më datë 16.06.2023, rreth orëve të para të mëngjesit, në rrugën dytësore Tiranë-Durrës, një automjet tip “BMË X5”, dyshohet ka dalë nga rruga dhe është përplasur me mbajtësen anësore të rrugës. Si pasojë e aksidentit ka ndërruar jetë shtetasi V. M., 35 vjeç, si dhe janë dëmtuar shtetasit E. H., 34 vjeç, dhe shtetasi E. C., 32 vjeç, të cilët ndodhen në spital, nën kujdesin e mjekëve. Grupi hetimor po punon për sqarimin e rrethanave të aksidentit“, njoftoi policia.
Ndërkohë, të afërmit e Visar Meshit kanë shprehur në rrjetet sociale ngushëllimet për ikjen e parakohshme të 35-vjeçarit.
“Visar, na i theve zemrat e na trishtove, te gjitha do i pranoja por jo te shkruaj mesazh lamtumire per ty”, shkruan një prej të afërmve.
“Nuk gjej dot fjalë për humbjen tënde Visar Meshi, komshi, shok dhe patriot i mirë. Tronditës ky lajm që mora sot për ty! Nuk dua ta pranoj por e vërteta e vdekjes qenka e pamëshirëshme dhe apsolute. Lamtumirë o njeri i mirë që na ike shumë shpejt”, shkruan një tjetër.
35-vjeçari ishte baba i dy fëmijëve (djem). Paraprakisht dyshohet se shkak për aksidentin ka qënë shpejtësia tej normave të lejuara dhe lagështia në rrugë, si rezultat i reshjeve të shiut.
Ndërkohë aksidenti tjetër fatal ka ndodhur këtë mesditë në aksin rrugor, Lezhë-Shkodër.
Dy automjete janë përplasur me njëra tjetrën e për pasojë ka humbur jetën një person. Burimet policore bëjnë me dije se viktimë ka mbetur, Gazmir Zhuka punonjës policie në Pikën e Kalimit Kufitar, Hani i Hotit. Zhuka ka qënë jashtë shërbimit në momentin e aksidentit.
Ndërkohë raportohet edhe për të plagosur, të cilët po transportohen në spital për ndihmë mjekësore. I plagosur ka mbetur drejtuesi i mjetit tjetër, i cili është një shtetas serb.
“Rreth orës 11:30, në aksin rrugor “Lezhë-Shkodër”, në Balldre, janë përplasur automjeti me drejtues shtetasin G. Zh., 46 vjeç, banues në Tiranë (punonjës policie, jashtë orarit të shërbimit ) dhe automjeti me drejtues shtetasin serb D. P., 30 vjeç.
Si pasojë, ka marrë dëmtime të rënda fizike, shtetasi G. Zh. i cili është transportuar në spitalin rajonal të Lezhës, për të marrë ndihmë mjekësore, por ka humbur jetën.
Grupi hetimor vijon veprimet në vendin e ngjarjes, për sqarimin e plotë të rrethanave të këtij aksidenti”,- njofton policia.
Ndërkohë siç duket edhe në pamjet e mëposhtme, përplasja ka qenë mjaft e fortë.
