KFOR ka reaguar në lidhje me arrestimin e 3 policëve kosovarë Rifat Zeka, Beqir Sefi dhe Mustafë Shemi më 14 Qershor nga forcat serbe.
Përmes një njoftimi, KFOR deklaron se pas shqyrtimit të vendndodhje së ngjarjes dhe bisedave me përfaqësues të institucioneve në Kosovë dhe të autoriteteve serbe, nga të dhënat që ka thotë se mbetet e paqartë se ku ndodheshin policët e Kosovës në momentin e arrestimit. Në vendodhjen Bare, KFOR thotë se institucionet e Kosovës ashtu edhe autoritetet serbe kanë përgjegjësi të qarta për t’u koordinuar me KFOR-in.
“Iu rikujtojmë të dyja palëve përgjegjësitë e tyre sipas Marrëveshjes Ushtarako-Teknike ndërmjet Serbisë dhe KFOR-it, si dhe procedurat për koordinim ndërmjet Policisë së Kosovës, përfshirë Policinë Kufitare dhe KFOR-it”- thuhet në komunikatë.
KFOR gjithashtu thekson se vendosja e Forcave të Sigurisë së Kosovës në veri të Kosovës kërkon pëlqimin paraprak të komandantit të KFOR-it.
“U bëjmë thirrje palëve që t’u përmbahen këtyre marrëveshjeve dhe procedurave për të bashkëpunuar me KFOR-in. Ne u bëjmë thirrje të dyja palëve të përmbahen nga retorika provokuese dhe të shmangin çdo veprim të njëanshëm që mund të përshkallëzojë tensionin në zonë”, vijon komunikata.
KFOR-i thotë se mirëpret të gjitha përpjekjet e komunitetit diplomatik për zgjidhjen e kësaj çështjeje dhe mbështet dialogun e lehtësuar nga BE-ja për normalizimin e marrëdhënieve ndërmjet Beogradit dhe Prishtinës.
Gjeneralmajor Ristuçia, komandant i KFOR-it, është në kontakt të rregullt me përfaqësues të institucioneve dhe organizatave të sigurisë në Kosovë, si dhe me përfaqësues të Forcave të Armatosura të Serbisë, Misionit të BE-së për Sundimin e Ligjit (EULEX), OSBE-së dhe komunitetit diplomatik.
Kujtojmë se autoritetet kosovare pretendojnë se tre policët janë rrëmbyer në territorin e saj, ndërsa Vuçiç deklaroi se janë arrestuar 1.8 km në brendësi të territorit të Serbisë
