“Një vjedhje me dyer të mbyllura”. Kështu e ka konsideruar deputeti i PD-së, Oerd Byllykbashi vendimin e Gjykatës Kushtetuese për rrëzimin e padisë së opozitës për projektin e portit të ri të Durrësit.
Në një postim në rrjetet sociale, Bylykbashi shkruan se Kushtetueseja ka gjykuar me dyer të hapura çështje qindra herë më pak të rëndësishme, ndërsa padinë për portin e rrëzuan me dyer të mbyllura.
Më tej, ai shkruan se vendimi u shpall dhe në zhurmën e video-skandalit të ish-kryebashkiakut të Kukësit, Safet Gjici, që sipas tij po mbulojnë një skandal të zi me një skandal rozë. Bylykbashi paralajmëron se do e paditin sërish portin e Durrësit.
Reagimi i plotë
Vjedhje me dyer të mbyllura
(Si të mbulosh një skandal të zi me një skandal rozë)
Falë reformës në “dredhësi”, Gjykata Kushtetuese mund të gjykojë një çështje për antikushtetuetshmëri, që ka interes publik, me dyer të mbyllura e pa praninë e palëve.
Padinë për Portin e Durrësit e rrëzuan me dyer të mbyllura.
Janë gjykuar me dyer të hapura çështje qindra herë më pak të rëndësishme.
Ama grabitja e pasurisë publike më strategjike të shqiptarëve nuk meritoka debat dhe vëmendje publike!
Madje u shpall nën zhurmën e skandalit Gjici.
Marrëveshjen Rama e negocioi me dyer të mbyllura, e miratoi me dyer të mbyllura në qeveri, e ratifikoi brenda një muaji duke shfrytëzuar mungesën e opozitës që kish djegur mandatet, dhe tani po me dyer të mbyllura Gjykata ia rrëzoi padinë e opozitës.
Vjedhje me maska në errësirë.
Kontrata e Ramës me partnerin e tij arab që po hetohet për projekt të ngjashëm në Indi, shkel Kushtetutën dhe sërish do paditet!
