Lulzim Basha ka sulmuar kreun e PD-së Sali Berisha këtë të Enjte, për të cilin thotë se “ndezi zjarrin e ndasisë brenda familjes tonë politike”.
Në një postim në rrjetet sociale dhe një fjalor me staturë si i një kryetari partie, ai bën me dije se ka zhvilluar një takim në Dibër “me demokratët dhe qendrestarët e Partisë Demokratike”, ku u diskutua “mbi të gjitha çështjet që kërkojnë vendimmarrje të rëndësishme për të ardhmen e forcës sonë politike dhe të Shqipërisë”.
“Demokratët do të bashkohen përmes vlerave, duke lënë pasë mendësinë konfliktuale dhe ndasitë artificiale të shkaktuara nga interesi personal i një individi që për hallin personal ndezi zjarrin e ndasisë brenda familjes tonë politike. Që Partia Demokratike të kthehet pranë qytetarëve, të dëgjojë ata dhe të ofrojë një alternativë për problemet e tyre, duhet të shkëputet nga teatri shterp i politikës, që asgjë të mirë nuk sjellë për jetët e njerëzve”, shkuan Basha në FB.
“Partia më e madhe e 14 majit ishte ajo e shumicës së heshtur që refuzoi të zgjedhë midis dy të këqijave. Ne duhet të shtrijmë dorën e bashkëpunimit ndaj kujtdo që është gati për të ndryshuar nga themelet sistemin politik, për të kthyer vendimmarrjen te qytetarët nëpërmjet listave të hapura, vetting-ut të politikanëve, kufizim të mandatit të kryeministrit dhe garantimin e votës së diasporës”, shton më tej.
Prej kohësh përflitet për një rikthim të tijin si kryetar në PD-në e vulës. Në parti ndërkohë ka lindur një përçarje me Alibeajn dhe mbështetësit e tij nga njëra anë të cilët kanë vendosur që zgjedhjet për kryetarin të mbahen në muajin Korrik.
Kundërshti ka pasur nga grupi tjetër i deputetëve që kanë kërkuar zhvillimin e zgjedhjeve së pari nëpër degë e më pas për kryetar dhe një bashkim i PD.
Megjithatë, grupi i Alibeajt ka nisur procedurat për përgatitjen e zgjedhjeve, ndërsa sot mbahet mbledhja e rëdhës e kryesisë e thirrur pikërisht me inicativën e tyre.
Nga ana tjetër, sekretari i partisë Gazment Bardhi është pozicionuar kundër Alibeajt dhe i ka cilësuar zhvillimet e fundit në kundërshtim me statutin. Vetë Bardhi nuk është paraqitur në mbledhjen e nisur në 17:00.
Raportohet se përveç tij, mbledhja është bojkotuar edhe nga deputetë të tjerë që kanë kundërshtuar vendimin e grupit Alibeaj për mbajtjen e zgjedhjeve më 27 Korrik. Mes tyre është Helidon Bushati, Lefter Gështenja, Saimir Korreshi, Bledjon Nallbati, Dhurata Cupi, Dashnor Sula, Juela Hamati.
Ndërkohë, raportohet se anëtarët e kryesisë që po marrin pjesë në mbledhjen e thirrur sot në PD janë Enkelejd Alibeaj, Taulanda Jupi, Gentian Gaba, Endri Hasa, Xhemal Gjunkshi, Kreshnik Collaku, Gazmend Konduzi, Taulant Zeneli, Agron Kapllanaj, Indrit Sefa dhe Fitim Zekthi.
Në mbledhjen e kaluar të kryesisë pati momente tensioni teksa disa mbështetës së Lulzim Bashës ofenduan dhe kërcënuan jashtë selisë, deputetët kritikë me grupin Alibeaj.
