Deputeti demokrat Tritan Shehu tha në mbledhjen e Komisionit për Politikën e Jashtme ku të pranishëm janë dhe kandidatët për ambasadorët e rinj se ajo që po ndodh me trupën diplomatike është një skandal i vërtetë. Ai e cilësoi skandal faktin që disa prej ambasadorëve qëndrojnë 12 vite në misionet e tyre.
Shehu shprehet se ministria e Jashtme nuk po sjell ndryshime të duhura në lidhje me trupën diplomatike.
Shehu tha se shumica e kandidatëve të rinj që janë propozuar për ambasadorë nuk vijnë nga trupa diplomatike por nga sektorë të ndryshëm dhe kjo sjell një pengesë të madhe sipas tij në progresin e diplomacisë shqiptare.
“Është mirë që pa një heshtje shumë të gjatë, ministria e Jashtme filloi të zgjohej dhe ka sjellë këtu një listë ndryshimesh të ambasadorëve. Ajo që po ndodh me trupën diplomatike është një skandal i vërtetë, kemi ambasadorë nga 10-12 vjet, që nuk kthehen, duke shkuar nga një mision tjetër dhe nuk kthehen në vendin tonë. Qëndrojnë në një mision shumë larg normave, normave dhe traditës së një vendi të zhvilluar, është e paprecedentë një gjë e tillë. Keni sjellë një numër kandidates, po janë shumë të tjerë që janë në këtë gjendje kënete dhe nuk i japin dinamizëm vendit tonë, është e paimagjinueshme, nuk i di arsyet, nuk ka ndodhur në historinë shqiptare. Mund të jenë klientelizmat, lidhjet e tjera të parregullta që krijohen me ambasadorët, nuk janë elementë parimorë që sjellin zhvillime por sjellin regres për trupin tonë diplomatik. Edhe në ndryshimet që keni bërë, thuhet që duhet të kenë minimalisht 10 vite eksperiencë me marrëdhëniet ndërkombëtare, por ju keni sjellë një listë që shoh shumë pak njerëz që vijnë nga trupi diplomatik.
Keni lënë ambasadorët aq gjatë, sa dhe konventa e Vjenës e vë si kërkesë që të ketë ndryshime të arsyeshme të ambasadorëve, ju duke i marrë nga sektorë që nuk lidhen, nuk janë pjesë e trupit diplomatik, shkatërroni dhe demotivoni diplomatik. Pse kemi trupin diplomatik, kur ai nuk ka të drejtë të bëhet ambasador, dhe vjen një tjetër nga jashtë? Shoh një andikap dhe pengesë të madhe në progresin e diplomacisë shqiptare, kjo sëmundje pasqyrohet dhe në listën për ambasadorët e rinj, të bën që ta shikosh me dyshim këtë lëvizje, që nuk do sjellë asnjë zhvillim për trupin diplomatik shqiptar”, tha ai.
