Reshjet e shiut kanë sjellë përmbytje këtë të Enjte në Luamas të Kuçovës.
Pamjet e publikuar në rrjetet sociale tregojnë sesi uji vërshon në toka furishëm. Lumi ndërkohë ka dalë nga shtrati duke krijuar probleme me qarkullimin e automjete dhe bllokuar banorët.
Lidhur me situatën ka reaguar dhe Lefter Maliqi, kandidati i Kuçovës në zgjedhjet e 14 Majit.
Ai e quan një skandal faktin që banorët janë lënë të bllokuar dhe pa ndihmë nga autoritetet.
“Turp, skandal, banorët në mëshirë të fatit. Lumasi i përmbytur, banorët kërkojnë ndihmë ‘mbetem te bllokuar’”, shkruan ai në një postim në rrjetet sociale.
Maliqi sjell në vëmendje edhe mungesën e investimeve në infrastrukturë dhe fenomenin e çakullit elektoral të cilin, siç shprehet, e mori lumi dhe shiu.
“Pushteti lokal i korruptuar, çakullin elektoral ne Lumas, Perondi, Kuçovë ja mori shiu e lumi”.
Maliqi, i cili ka apeluar në institucionet e KQZ rezultatin e zgjedhjeve të cilin e cilëson të manipuluar, shprehet se bashkia “do t’ju kthehet qytetarëve”.
“Fshatra pa ura, pa kanale kulluese pa prita. Se bashku çdo gjë do ndryshojmë. Kuçova do kthehet ne kantier ndërtimi, Bashkia do ju kthehet qytetareve”, përfundon ai.
