Mes nëntë detyrave që Kuvendi i ka lënë Komisionerit për të Drejtën e Informimit dhe Mbrojtjen e të Dhënave Personale bie në sy një pikë që lidhet me monitorimin e përpunimit që bëhet nga palë të treta ku ndër ta edhe ndërmjetësit e pasurive të paluajtshme.
Ky profesion është futur së fundmi në një cikël rregullues të kuadrit ligjor duke u klasifikuar si një profesion i lirë dhe duke specifikuar kushtet për licencimin.
Konkretisht në rezolutën e Kuvendit në pikën 5 thuhet se Komisioneri duhet të “vijojë monitorimin e përpunimit të ligjshëm të të dhënave në kontrollues publikë dhe privatë, duke u fokusuar në veprimtarinë e autoriteteve ligjzbatuese apo edhe sektorin privat, sektorin financiar jo bankar; ndërmjetësimit të pasurive të paluajtshme, etj.”.
I njëjti dokument specifikon që Komsioneri duhet të luajë rol aktiv në përmbylljen e procedurave për miratimin e kuadrit ligjor/nënligjor për të dy fushat e veprimtarisë.
Po kështu të thellojë mbikëqyrjen dhe monitorimin e zbatimit të ligjit për të drejtën e informimit, duke patur si qëllim rritjen e kontrollit mbi veprimtarinë e administratës publike, si dhe garantimin e aksesit në informacion publik.
Një tjetër detyrë është të thellojë monitorimin dhe mbikëqyrjen për transparencën proaktive të autoriteteve publike, për verifikimin e zbatimit dhe përditësimit të Programit të Transparencës dhe Regjistrit të Kërkesave dhe Përgjigjeve;
Sipas Kuvendit zyra e Komisionerit duhet të nxisë shtrirjen e instalimit të Regjistrit Elektronik të Kërkesave dhe Përgjigjeve për të Drejtën e Informimit (REKPDI), në sa më shumë autoritete publike, si dhe të mundësojë ndërthurjen e tij me shërbimet që ofrohen nga AMS/e-Albania, në bashkëpunim më Agjencinë Kombëtare të Shoqërisë së Informacionit.
Në pikan gjashtë u vendi nënvizon se duhet të vijojnë të kryhen monitorime tematike mbi disa nga detyrimet e ligjit për mbrojtjen e të dhënave personale (informim/pëlqim/njoftim/masat e sigurisë) në kontrollues që e ushtrojnë veprimtarinë e tyre në sektorë si: shërbimi postar publik/privat, marketing i drejtpërdrejtë, sektori i arsimit, etj.
Sipas projektrezolutës gjithashtu duhet të luajë rol aktiv në zgjerimin e rrjetit të nëpunësve për mbrojtjen e të dhënave personale dhe forcimin e kapaciteteve profesionale për përmbushjen e detyrimeve ligjore;
Komisionerit i kërkohet që të bashkëpunojë në mënyrë të vazhdueshme me qytetarët dhe grupet e interesit për njohjen e kuadrit të modernizuar ligjor në të dyja fushat e përgjegjësisë si dhe të nxisë ndërgjegjësimin për zbatimin e tij.
Në pikën e fundit theksohet se duhet të vijojë të luajë rol aktiv në përmbushje të funksionit të anëtarit të Komitetit Ekzekutiv të Konferencës Ndërkombëtare të Komisionerëve të Informimit (ICIC), të marrë masat përgatitore për realizimin e edicionit të 15-të të Konferencës në Tiranë, si dhe të vijojë angazhimin aktiv në organizmat e tjerë ndërkombëtare ku Zyra e Komisionerit është pjesë.
