Giovanni Colella nuk është më trajner i Partizanit.
Trajneri italian është larguar përfundimisht, paçka se ishte në kontratë edhe për një sezon tjetër.
Klubi i kuq ka zyrtarizuar gjithçka në rrjetet sociale, ku thuhet se trajneri italian është dorëhequr nga drejtimi i skuadrës.
“Partizani njofton mbylljen e bashkëpunimit me trajnerin Giovanni Colella, i cili sot i ka prezantuar dorëheqjen e parevokueshme presidentit Demi. Trajneri largohet nga Partizani pas nje viti të suksesshëm ku arriti së bashku me skuadrën objektivin madhor, titullin KAMPION… Falenderojmë për kontributin “mister” Colella-n, që largohet nga Shqipëria si trajneri KAMPION, dhe i bëjmë me dije se dera e Partizanit do mbetet e hapur për bashkëpunime të tjera në të ardhmen. GRAZIE MISTER Ti mbetesh njëri prej nesh… P.M.T.P” – shkruan klubi.
Colella ishte mjaft i suksesshëm këtë sezon në kryeqytet, ku riktheu Partizanin te titulli kampion. 56-vjeçari qëndroi në krye të kësaj pankine për 42 ndeshje, ku ekipi ia doli të marrë mesatarisht 1.90 pikë për ndeshje.
Pritet që deri në fundjavë Partizani të zyrtarizojë trajnerin e ri, i cili do të jetë kroati Tomislav Stipiç, që aktualisht është pjesë e Rigës në Letoni.
