Ish-kryebashkiaku i Durrësit Vangjush Dako u arrestua këtë të Martë.
Hetimet e SPAK lidhen me një objekt që ka ndërtuar disa kate pa leje, të legalizuara me procedura që dyshohen jo të rregullta. Objekti më pas pësoi dëmtime të konsiderueshme nga tërmeti i 26 nëntorit 2019. Për çështjen ka pasur një kallëzim më herët. Sipas burimeve, Dako akuzohet dhe për një procedurë tenderimi. Kallëzimi për parregullsi në këtë tender është bërë nga Kontrolli i Lartë i Shtetit, që ka përllogaritur se në këtë rast, shtetit i është shkaktuar një dëmin prej 180 milionë lekësh të vjetra.
Emri i Vangjush Dakos doli edhe në përgjimet e dosjes 339, që zbuluan lidhjen e zyrtarëve të lartë me persona me precedentë të theksuar kriminale me qëllim shit-blerjen e votave apo ndikim në zgjedhjet parlamentare të 2017-ës. Hetimet për çështjen e krimit zgjedhor u ndanë më tej nga akuza në fraksion të dosjes 339, megjithatë ndaj asnjë zyrtari nuk janë ngritur akuza penale, deri më sot.
Ish-kryebashkiaku i Durrësit për tre mandate ka mohuar të gjitha akuzat ndaj tij. “Unë jam akullore”, do të deklaronte ai në një emision televiziv disa vite më parë.
Ndërkohë, sipas Departamentit Amerikan të Shtetit që e ka shpallur person “non grata”, Dako “ka qenë i përfshirë në korrupsion gjatë mandatit të tij si kryetar i Bashkisë së Durrësit”.