Ish-kryebashkiaku i Durrësit, Vangjush Dako, ka lënë qelinë e burgut pas kryerjes së dënimit me 2 vite e 8 muaj heqje lirie.
Vangjush Dako duhet të kthehej në qeli më 16 shtator, sipas vendimit të dhënë nga Apeli i GJKKO-së, por përpara se të kthehej në qeli, Dako (siç e kanë zakon socialistët e dënuar), u shtrua në spital, pasi sipas raportimeve kishte probleme me aritminë.
Disa ditë më pas, pasi Dako u ndje më mirë, u rikthye në qelinë e burgut të Durrësit për të kryer pjesën e mbetur të dënimit. Nga përllogaritja e kohës së paraburgimit dhe arrestit shtëpiak, atij i mbeteshin edhe 10 ditë burgim, prej të cilave 4 ditë i kaloi në spital për shkak të problemeve shëndetësore. Në bazë të Kodit Penal, qëndrimi në spital i njihet si kohë vuajtjeje dënimi.
Dako u arrestua më 6 qershor 2023 dhe u lirua në shkurt 2024 pasi i përfundoi afati i paraburgimit. Më pas qëndroi në arrest shtëpie deri më 25 nëntor 2024, kur GJKKO e dënoi me 2 vite e 8 muaj burg për shpërdorim detyre në dy raste.
Rasti i parë lidhet me një pallat në Durrës, ndërtuar 12 vite më parë dhe shembur nga tërmeti i vitit 2019. Leja e ndërtimit për këtë objekt u miratua tre vjet pas përfundimit të tij, duke legalizuar 4 kate të ndërtuara pa leje, ndërkohë që ndërtimi nuk ishte kryer sipas projektit të miratuar.
Rasti i dytë lidhet me tenderin për ndërtimin e një shëtitoreje gjatë viteve 2014-2015, për të cilin Kontrolli i Lartë i Shtetit konstatoi një dëm prej 18 milionë lekësh për buxhetin e shtetit.
Përveç dënimit me burg, vendimi i Gjykatës së Posaçme i heq Dakos të drejtën për të ushtruar funksione publike për një periudhë 5-vjeçare.
LEXO EDHE:
Vangjush Dako rikthehet në burgun e Durrësit, ja sa kohë do të qëndrojë në qeli ish-kryebashkiaku
