Ministria e Shëndetësisë, Ogerta Manastirliu, ka folur ditën e sotme në Kuvend lidhur me arrestimin e seketares së përgjithshme, Joana Duro, e akuzuar për korrupsion.
Gjatë fjalës së saj, Manastirliu, ‘lau duart’ duke thënë se distancohet plotësisht, duke hequr kështu nga vetja përgjegjësinë. Më tej Manastirliu shtoi se përgjegjësia është personale, dhe Duro duhet të përballet me pasojat e ligjit.
Manastirliu: Distancohemi plotësisht! Cilido që shkel këto parime duhet të përballet me pasojat që parashikon ligji. Ky ka qenë qëndrimi dhe bindja ime që kur kam marrë poste publike. Rasti duhet të hetohet deri në fund. Nëse del të përballet me pasojat e ligjit. Sot kemi organe drejtësie të pavarura.
Kujtojmë se Sekretarja e përgjithshme e Ministrisë së Shëndetësisë, Joana Duro u arrestua ditën e premte me urdhër të Prokurorisë së Posaçme, nën akuzën për korrupsion, pasi dyshohet se ka abuzuar me një tender.
Në pranga bashkë me Joana Duron ka rënë edhe Laura Shteto, me detyrë specialiste, administratori i kompanisë, ‘DRICONS’, Vladimir Topi dhe inxhinieri i kompanisë, shtetasi S.Sh.
Një ditë më parë SPAK, zbardhi edhe skemën e ryshfetit, ku bëhej me dije se Topi së bashku me inxhinierin e kompanisë i dhanë Duros, 330 mijë lekë ryshfet që ajo të ndikonte për t’i shpallur fitues në tenderin për supervizimin e rikonstruksionit të disa qendrave shëndetësore në qarqet Tiranë dhe Durrës.
