Një fëmijë rreth 7 vjeç humbi jetën nga përplasja e dy mjeteve në zonën e Bërxullës në Tiranë pasditen e sotme.
Sipas informacioneve, njëri nga mjetet pasi u përplas me makinën tjetër, përfundoi në fasadën e një lokali buzë rrugës. Pikërisht brenda këtij lokali, në pjesën e xhamave, aty ku përfundoi dhe një nga mjetet, qëndronte fëmija.
Burime mediatike bëjnë me dije se lokali është në pronësi të babait të fëmijës. Si pasojë e përplasjes, i mituri humbi jetën në vend.
Ndërkohë, policia është duke hetuar shkaqet e përplasjes mes dy automjeteve. Paraprakisht dyshohet që shkak të ketë qenë shpejtësia e lartë ose parakalimi i gabuar.
