Erisa Fero kërkon lirimin nga qelia.
Ish-zyrtarja e AKSHI-t u arrestua nga policia në Dhjetor të vitit të kaluar bashkë me dy persona të tjerë si pjesë e një grupi që merrej me trafik droge.
Ajo u vu në pranga nga policia në Qafthanë pasi dyshohet se po kryente trafik të lëndëve narkotike dhe në makinën që ajo drejtonte u gjetën 58 kilogramë kanabis.
Sipas policisë, Erisa Fero 29 vjeçe nga Pogradeci dhe banuese në Tiranë, Likë Basha 33 vjeç nga fshati Mafsheq i Krujës dhe 18-vjeçari Maringlen Karaj nga Kruja, kanë udhëtuar nga Tirana me ngarkesën e drogës për ta dorëzuar tek 2 persona që u shpallën në kërkim F.S dhe G.S. nga fshati Piskupat i Pogradecit.
Këta të fundit dyshohet se do ta transportonin drogën me varkë në drejtim të Maqedonisë së Veriut ku i prisnin persona të tjerë.
Ndaj tre të pandehurve, gjykata e Pogradecit dhe më pas Apeli vendosën ndaj tre të akuzuarve masën e sigurisë së arrestit me burg.
Masë që është ankimuar prej tyre në Gjykatën e Lartë.
