35-vjeçari Leksi Veshollari është arrestuar në Devoll, pasi u kap në drejtimin e një furgoni, në të cilin ishin edhe 23 refugjatë.
“Specialistët për Hetimin e Trafiqeve të Paligjshme dhe Narkotikëve të DVP Korçë, në bashkëpunim me shërbimet e Komisariatit të Policisë Devoll, në bazë të informacioneve të siguruara nga inteligjenca informative, për një tjetër rast të transportimit të kundërligjshëm të emigrantëve, kanë organizuar dhe finalizuar operacionin policor të koduar ‘Midnight 12’, si rezultat i të cilit u arrestua shtetasi: L.V., 35 vjeç, banues në fshatin Buçimas, Pogradec”, njoftoi këtë të hënë policia.
“35-vjeçari u kap në flagrancë nga shërbimet e Policisë, në afërsi të fshatit Tren, Devoll, teksa transportonte me një automjet (furgon), kundrejt pagesave 300-1000 euro/person, 23 emigrantë nga vendet e treta, me qëllim kalimin ilegal të kufirit, me destinacion final shtetet e BE-së”, shtuan të njëjtat burime.
Në cilësinë e provës materiale u sekuestruan furgoni dhe një celular.
