Pas një sezoni zhgënjyes, të mbyllur në vend të 12-të në Premier League, Chelsea ka zyrtarizuar trajnerin e ri.
Në stolin e Bluve, me misionin e vështirë për të ringritur skuadrën, do të ulet Mauricio Pochettino. Argjentinasi, i cili më parë ka drejtuar Tottenham, ka nënshkruar një marrëveshje dyvjeçare me klubin londinez, me opsionin për të shtuar një vit të tretë në kontratë në varësi të rezultateve.
Pochettino nis punën më 1 korrik dhe do të marrë edhe stafin e tij me vete, Jesus Perez, Miguel d’Agostino, trajnerin e portierëve Toni Jimenez dhe djalin e tij Sebastiano Pochettino, në rolin e përgatitësit atletik. Ai duhet të rindërtojë skuadrën pas shpenzimeve marramendëse të bëra vitin e kaluar, ku klubi nxori nga arkat plot 600 milionë paund.
Përveç Tottenham, Pochettino ka drejtuar edhe Paris SG, Southampton dhe Espanyol.
Kështu, sulmuesi i Kombëtares, Armando Broja, do të luajë nën drejtimin e argjentinasit, gjithmonë nëse do të jetë në “Stamford Bridge” sezonin e ardhshëm. Për yllin e Shqipërisë është interesuar Sporting Lisbona, të cilët e kërkojnë në huazim, por mbetet për t’u parë si do të ndryshojnë gjërat pas emërimit të Pochettino-s.
Pas eksperiencës shumë të mirë te Southampton gjatë edicionit të kaluar, 21-vjeçari qëndroi në “Stamford Bridge”, por aventura e tij ishte e pafat. Në muajin dhjetor, ai pësoi një lëndim të rëndë në gju, duke humbur gjysmën e mbetur të sezonit.
