Incidentet e ndodhur pasditen e djeshme në stadiumin “Egnatia Arena” të Rrogozhinës mes Tiranës dhe Bylisit, me pretendimet bardheblu ndaj një gjykimi jo korrekt në atë takim që prodhoi edhe brazimin, që i humbi kryesimin kryeqytetasve, duket se është vetëm fillimi i problemeve të mbylljes së këtij sezoni për skuadrën kampione në fuqi deri në këto momente.
Komisioni i Disiplinës pranë Federatës Shqiptare të Futbollit ka nisur punën për të analizuar raportet e gjyqtarëve të takimit për atë çka ndodhi, ku mes tifozëve ishin të pranishëm edhe lojtarët dhe drejtues të stafit teknik të ekipit bardheblu.
Si rrjedhojë priten dënime të tjera shtesë, veç atyre sportive që dha në fushë gjyqtari Kridenc Meta, ku për shkak kartonash në ndeshjen e fundit të kampionatit, Tirana është praktikisht vetëm me një mesfushor të formacionit, Hilën. Ndërsa Aleksi dhe Deliu, së bashku me Lushkjen e dëmtuar, nuk do të jenë në ndeshjen me Erzenin, ku ndahet edhe matematikisht titulli me Partizanin.
Një situatë aspak e favorshme për Tiranën që ka kryesuar gjatë sezonin deri në javën e 35-të, ndërkohë që ndodh krejt e kundërta me Partizanin, që tashmë në krye edhe pse me pikë të barabarta, por me klasifikim të bazuar në përballjet direkte, pret të festojë titullin ditën e hënë në ndeshjen përballë Teutës.
Pasi ka humbur kryesimin rrjedhimisht edhe kampionatin, me shumë mundësi, bardheblutë do të shkojnë të gjymtuar, jo vetëm sportivisht, por edhe psikologjikisht edhe për finalen e Kupës së Shqipërisë, që do të luajnë më 1 qershor përballë Egnatias, duke humbur praktikisht një sezon që të luftuar deri në momentet e fundit.
