Ndeshja mes Tiranës dhe Bylisit përfundoi në paqe 2-2, por duket se vetëm rezultati ishte i tillë.
Bardheblutë protestuan gjatë për një penallti të akorduar në favor të ballshiotëve në fund, pasi sipas tyre ishte inekzistente.
Në fundin e sfidës së luajtur në Rrogozhinë, tifozët kanë hyrë në fushë duke tentuar të sulmojnë arbitrin për vendimin që mund t’i kushtojë titullin bardhebluve.
Policia ka dalë me një njoftim zyrtar, ku bën me dije se ka shoqëruar disa shtetas.
Vlen të theksojmë se arbitër kryesor ishte Kridens Meta.
Njoftimi i policisë
Rrogozhinë/Informacion paraprak
Më datë 25.05.2023, në përfundim të ndeshjes Bylisi-Tirana, në Rogozhinë, disa tifozë të Tiranës kanë hyrë në fushë dhe kanë tentuar të dhunojnë gjyqtarët e ndeshjes. Shërbimet e Policisë kanë reaguar menjëherë duke shoqëruar këta shtetas, për të cilët po kryhen veprimet e mëtejshme procedurale.
Grupi hetimor po punon për sqarimin e rrethanave të ngjarjes.
