Lideri jetëgjate i Turqisë ka dëshmuar gjatë pushtetit të tij një stil qeverisje autokratik, ndërsa në mediat prestigjioze dhe liderë europianë është cilësuar një diktator.
Megjithatë, në mënyrë të habitshme, të ftuarit e gazetarit Blendi Fevziu këtë të enjte, e quajtën reformator.
Këtë të Enjte, në emisionin “Opinionin” të moderuar prej Fevziut ishin një kast të ftuarish që diskutonin për liderin e Turqisë prej gati një dekade. Të ftuarit bënin lëvdata për Erdoganin si një reformator dhe njeri demokratik, ndërkohë që gazetari Berat Buzhala tregoi një ngjarje personale që tregon mentalitetin autokrat të Turqisë dhe Erdoganit.
Buzhala zbuloi se nga shteti turk i është kërkuar qeverisë së Kosovës që ta arrestojnë.
“Kur ka filluar të trajtojë Ballkanin si vilajet të Perandorisë Osmane ka lëshuar urdhër, ka shkuar ambasadorja turke tek ministri i Punëve të Brendshme të Kosovës dhe i ka thënë arrestojeni Beratin. Fatmirësisht nuk më kanë arrestuar sepse ka pasur një ndikim të madh të shteteve mike, i kanë shkuar qeverisë së Kosovës…”, rrëfeu Bazhala.
Blendi Fevziu: Në Turqi ke shkuar ndonjëherë?
“Jo, as në shtetet që janë afër Turqisë”, përgjigjet Buzhala.
Fevziu: Prandaj s’ke dëgjuar ti për Erdoganin se nuk e ke parë Stambollin në vitet e fundit?
“Kjo është propaganda e egër që bëhet e erdoganistëve që e lidhin fatin e Turqisë me Erdoganin. Unë nuk e përziej atë gjë”, përgjigjet Buzhala.
