Gjykata e Apelit në Bruksel tre ditë më parë vendosi bllokimin e aseteve të kompanisë Alcontrol në shumën prej 65 mln euro dhe kalimin e tyre në favor të ish pronarit të Agon Channel, Françesko Bechetti.
Por cilat janë rreziqet e tjera për Shqipërinë?
Besmir Kodra, përmbarues privat dhe nënkryetar i Dhomës së Përmbaruesve Privat të Shqipërisë, shpjegon për Syri TV rreziqet dhe çfarë ndodh pas këtij vendimi. Sipas tij, Shqipëria ka pretenduar se bllokimi është i padrejtë, sepse të ardhurat e Abcontrol nuk janë të shtetit Shqiptar, por gjykata e Apelit vërtetoi se shuma e bllokuar janë të ardhura të shtetit shqiptar, duke vendosur si të drejtë bllokimin.
“Tashmë vendimi ka marrë formë të prerë dhe vlera do të ekzekutohet. Për këtë qëllim është ngritur një grup përmbaruesish për ta bërë këtë gjë”, tha Kodra.
Por çfarë do të ndodhë me shumën e mbetur?
“Në momentin që ka vendosur sekuestron përmbaruesi i Belgjikës këto 65 milion euro, Bechetti do I marrë menjëherë dhe shuma tjetër që do të mblidhet nga Albcontrol do të grumbullohen dhe më pas do t’i kalojnë Bechettit”, tha Kodra.
Kodra shtoi se ka edhe shumë çështje që po ecin paralelisht. Procesi i bllokimit të parave nisi nga Belgjika, u shpreh, ndërsa shtoi se nuk është çudi që para mund të ketë edhe në Itali dhe bllokimi mund të nis edhe atje.
Përmbaruesi foli edhe për koston që ka kjo çështje për Shqipërinë, duke marrë parasysh faktin se ka edhe çështje të tjera që po shqyrtohen. Ndërkohë ai theksoi se vlera që mund t’i kalojë Bechettit mund të arrij deri në 150 milion, kjo për shkak të procedurave.
Por Kodra tha se fatura e Shqipërisë mund të shkojë deri në 750 milion euro.
