Partia në pushtet “Demokracia e Re” duket se do të korrë një fitore të rëndësishme në zgjedhjet parlamentare të së dielës në Greqi, tregojnë rezultatet paraprake. Pavarësisht fitores së mundshme kundër opozitës së majtë “Syriza”, duket se Kryeministri Kyriakos Mitsotakis nuk do të jetë në gjendje të marrë votat e mjaftueshme për të formuar i vetëm qeverinë.
Ndërsa janë numëruar më shumë se gjysma e votave, deri në publikimin e këtij lajmi, konservatorët në pushtet gëzojnë një epërsi të madhe me 40.9%, duke mposhtur radikalët e së majtës. Partia Syriza, e cila drejtoi Greqinë nga viti 2015 deri në vitin 2019, ka marrë deri tani 20.1% të votave.
Sipas analistëve, partia në pushtet ka gjasa të mos kalojë pragun e duhur të votave për të formuar e vetme qeverinë.
Ministria e Brendshme e Greqisë parashikoi se Demokracia e Re mund të marrë 145 vende në parlamentin me 300 anëtarë, gjashtë më pak se shumica e kërkuar për të formuar e vetme qeverinë.
Megjithatë, rezultati tregon një mbështetje të madhe për Kryeministrin Kyriakos Mitsotakis, administrata e të cilit u përball me një skandal përgjimi, krizën e kostos së jetesës dhe një aksident hekurudhor vdekjeprurës në muajin shkurt që shkaktoi zemërim të gjerë në vend.
Mos plotësimi i pragut të nevojshëm të fitores do të çonte në konsultime mes partive politike për gjetjen e një gjuhe të përbashkët. Nëse asnjë parti nuk kalon pragun e duhur të fitores, Presidentja Katerina Sakellaropoulou do t’u japë tre partive të para një mandat tre-ditor secilës për të formuar një qeveri.
Nëse ato dështojnë, Presidentja Sakellaropoulou do të emërojë një qeveri të përkohshme që do ta çojë vendin në zgjedhje të reja rreth një muaj më vonë.
