Policia e Tiranës ka vendosur nën pranga një të ri pasi akuzohet se ka marrë “peng” dhe e ka kërcënuar me jetë një shtetas 53-vjeçar tek zona e “Brrylit” në kryeqytet.
Uniformat blu kanë arrestuar shtetasin Arment Trezhnjeva i cili ka kanosur me mjet thikë dhe e ka dërguar në një banesë private të moshuarin, në zonën e “Ali Demit”, ku më pas i ka marrë me dhunë telefonin.
“Shërbimet e Komisariatit të Policisë Nr. 1, pas kallëzimit nga një 53-vjeçar, për një shtetas që i kishte hequr lirinë duke e kanosur me thikë dhe i kishte marrë me dhunë celularin, kanë organizuar dhe finalizuar operacionin policor të koduar “Brryli”, për zbardhjen e këtij rasti. Si rezultat i operacionit u arrestua në flagrancë shtetasi A. T., 23 vjeç, banues në Tiranë. Nga veprimet hetimore dyshohet se 53-vjeçari është takuar me shtetasin A. T., te Brryli, pasi kishin komunikuar në rrjetet sociale, dhe më pas shtetasi A. T., duke e kanosur me mjet prerës (thikë), e ka dërguar atë në një banesë private, në zonën e Ali Demit, ku më pas i ka marrë me dhunë aparatin celular”, njofton policia.
Në cilësinë e provës materiale u sekuestruan 2 aparate celulare dhe 1 mjet prerës (thikë).
Materialet proceduale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme.
