Vetëm pak kuti kanë ngelur për t’u numëruar në disa bashki të vendit, për të finalizuar procesin zgjedhor të 14 Majit dhe në studiot televizive ka nisur analiza për rezultatin, që shkon në favor të Partisë Socialiste.
Referuar shifrave, gazetari Klodian Tomorri tha për MCN se opozita është sulmuar nga shumë faktorë dhe është punuar gjatë gjithë kohës kundër saj.
Tomorri u shpreh se dhe ndërkombëtarët e kanë sulmuar opozitën dhe tashmë ata po kuptojnë që kanë “vrarë” pluralizmin në Shqipëri.
“Ky s’është sistem i bërë nga qytetarët dhe nuk janë të njëjtat kushte si në 2013 sepse nuk është sulmuar opozita nga faktori ndërkombëtarë, kanë punuar të gjithë kundër opozitës. Jemi një vend ku media është totalisht e kontrolluar dhe Shqipëria është i vetmi vend ku pas çdo tenderi është një pronar mediash; elita është e përgjumur ose kompromentuar. Nëse faktorizon të gjithë këto elementë dhe ndërkombëtarët tani kanë filluar të kuptojnë se çfarë bënë se praktikisht kanë vrarë pluralizmin në Shqipëri”, tha gazetari.
Më tej, Tomorri u shpreh se sistemi është kompromentuar dhe këto zgjedhje nuk janë çështje lidershipi dhe emrash, pasi sipas tij në shumë qytete koalicioni opozitar “Bashkë Fitojmë” kishte kandidatura të mira me bagazh intelektual.
“Popullsia rezidente në Shqipëri është gati 2 milion e 700, krahasuar me 2019 ka më pak. Duhet të kemi parasysh që kemi një pjesë të popullsisë që nuk jeton këtu dhe jemi në zgjedhje lokale dhe apeli për të votuar është më i ulët. Nuk shoh atë rënie dramatike. Janë në një zgjedhje me një pjesëmarrje relativisht normale. Ajo që doja të thoja është se mesazhi i këtyre zgjedhjeve është se kuptojmë që nuk është çështje lidershipi e emrash, sepse kemi 2-3 qytete që kishte diferenca në aspektin e cilësisë së kandidatëve. Marrim këtu Durrësin, Lezhën dhe Kukësin ku kanë në kandidatura kandidatë me cilësi intelektuale”, theksoi Tomorri.
Ai shtoi se sistemi është aq i kompromentuar në Shqipëri sa edhe po të vendoset Angela Merkel në krye të opozitës, sërish nuk fiton.
“Nëse ne tani përpiqemi të kuptojmë çfarë do të ndodhë pas këtyre zgjedhjeve është se është kompromentuar sistemi dhe është kompromentuar aq keq aq sa po të marrësh Angela Merkelin ta vendosësh në opozitë këtu nuk i fiton zgjedhjet”, nënvizoi ai.
