Vetëm 15 minuta pas mbylljes së procesit të votimit në mbarë vendin, tensione janë shënuar në Lezhë, pasi sipas një denoncimi në polici nga ish-kryekomunari i Shëngjinit, Salvador Kaçaj, ai është kërcënuar me armë.
Policia njofton se Kaçaj është paraqitur në Komisariatin e Lezhës për të denoncuar se teksa ishte duke lëvizur me të birin dhe shoferin, në aksin rrugor Lezhë-Milot, dy persona i kanë prerë rrugën dhe njëri prej tyre mbante në dorë armë zjarri të llojit pistoletë.
Shoferi i makinës së Kaçajt, i cili mbështeste në këto zgjedhje kandidatin e koalicionit “Bashkë Fitojmë”, Pashk Gjoni, ka manovruar duke e kthyer mjetin në drejtim të Lezhës dhe menjëherë janë paraqitur në polici ku kanë bërë edhe kallëzimin.
Kujtojmë se Kaçaj ka qenë edhe një nga kandidatët për bashkinë e Lezhës në procesin e “Primareve” të Partisë Demokratike.
Njoftimi i policisë:
Lezhë/Informacion paraprak
Rreth orës 18:00, është paraqitur në Komisariatin e Policisë Lezhë shtetasi S. K. 56 vjeç, banues në Lezhë, dhe ka bërë kallëzim se ka qenë duke lëvizur me mjetin e tij së bashku me djalin e shoferin, në aksin rrugor Lezhë-Milot, dhe konkretisht sapo kalon vendin e quajtur M+, dy automjete i kanë dalë përpara duke i bllokuar rrugën. Nga automjetet kanë zbritur dy persona të panjohur prej tij, ku njëri prej tyre është afruar me vrap në drejtim të mjetit të tij dhe dyshohet se në dorë mbante një pistoletë.
Drejtuesi i mjetit ku udhëtonte shtetasi S.K., ka manovruar duke e kthyer mjetin në drejtim të Lezhës dhe kanë ardhur menjëherë në polici ku kanë bërë edhe kallëzimin.
Në lidhje me kallëzimin e shtetasit S.K., shërbimet e Policisë kanë njoftuar menjëherë Prokurorin si dhe nën drejtimin e tij, po kryejnë të gjitha veprimet hetimore dhe procedurale me qëllimin zbardhjen e plotë të rrethanave të ngjarjes, identifikimin dhe kapjen e autorëve të dyshuar.
