Votimi me detyrim për çdo shtetas në listën e zgjedhësve, është zgjidhja që Sali Berisha propozoi sot gjatë bashkëbisedimit me qytetarët në platformat sociale, duke shprehur bindjen se do të mundësonte ndaljen e shit-blerjes së votës.
Për të treguar se ky propozim që kërkon ndryshim të Kodit Zgjedhor dhe do të jetë i vështirë të pranohet nga një manipulues i votimeve si Edi Rama, është i suksesshëm, Berisha përmendi rastin e Australisë dhe Greqisë.
“Pa këtë lëvizje, pa mosbindjen civile, si element të shenjtë të kësaj lëvizje, këtu zgjedhje dhe votime nuk ka. Votimi i detyrueshëm do e bëjë të pavlefshme blerjen e votës. Sepse blerjet janë dy llojesh, nga njëra anë është blerja e të drejtës së votës. Ana tjetër është merr paratë dhe dil e voto për mua. Kjo e dyta, nëse bëhet votimi me detyrim siç e ka Greqia apo Australia. Një nga miqtë e mi në Australi më ka thënë se kjo është bërë për t’i dhënë fund blerjes së votës. Por Edi Rama nuk e pranon se ai e quan Kodin Zgjedhor një kinezëri. Ai pranon vetëm standarde që i lejojnë atij të manipulojë votën”, tha Berisha.
Ndërkohë, Berisha ka zbutur tonet përkundrejt grupit të PD-së së Vulës, duke u shprehur se në këto zgjedhje përveç Lulzim Bashës dhe Enkelejd Alibeajt, të gjithë deputetët e tjerë kanë mbështetur kandidatët e ‘Primareve’ duke bërë fushatë për ta në çdo zonë.
Ai theksoi se sjellja e tyre në këto zgjedhje ka qenë brenda parimeve dhe statutit të Partisë Demokratike, duke dhënë kështu sinjalet e para për një mundësi ribashkimi, teksa dyert i la të hapura që prej 15 Majit
“Mendoj se zgjedhjet janë një test në të gjitha partitë, debatet janë një gjë normale, kur zgjedhjet janë një provë krejtësisht themelore që ndan ose bashkon njerëzit, përveç Bashës dhe Alibeajt nuk di deputet që të mos kenë mbështetur kandidatët e primareve dhe në këtë kontekst ata kanë qëndruar brenda parimeve të statutit të dhe PD. I ftoj të negociojmë, të bashkohemi në interesin më të madh të demokratëve”, u shpreh lideri i opozitës.
