Në disa bashki të vendit ka nisur procesi i numërimit të votave pas finalizimit të procesit zgjedhor të kësaj të diele, por partitë opozitare janë duke denoncuar parregullsi e problematika të shumta.
Sipas Lëvizjes “BASHKË”, e cila kandidon me Arlind Qorin në Tiranë, vëzhguesit e tyre në kryeqytet kanë konstatuar se vëzhguesit e PS ishin pajisur me listat e zgjedhësve dhe mbanin shënime për ata votues që paraqiteshin pranë QV-ve.
Gjithashtu është konstatuar masivisht mosngjyrosja e gishtit me bojë dhe shkeje të tjera si ajo ku vëzhgues të PS kanë hedhur votën në kutitën e votimit për zgjedhës të ndryshëm.
REAGIMI:
Vëzhguesit e Lëvizjes BASHKË ditën e sotme kanë qenë të pranishëm në të gjitha qendrat e votimit dhe kanë konstatuar parregullsitë e mëposhtme:
– Vëzhguesit e Partisë Socialiste kishin lista emërore të votuesve dhe – të asistuar nga anëtarët e komisioneve – mbanin shënim emrat e votuesve që paraqiteshin në qendrën e votimit. Kjo praktikë cenon anonimatin e votuesve dhe të drejtën e tyre për të marrë pjesë – ose jo – në votime.
– Janë konstatuar raste kur fleta e votimit është shenjuar me bojën e vulave. Edhe kur votuesi ka kërkuar zëvendësimin e fletës, kjo gjë është refuzuar nga komisioni.
– Është konstatuar një rast ku një prej vëzhguesve në qendrën e votimit merrte fletët nga votuesit dhe i hidhte ai në kuti. Edhe kur komisioni u vu në dijeni nga ana e vëzhguesve tanë për këtë parregullsi, komisioni refuzoi të merrte masa.
– Në disa raste komisionerët kanë refuzuar t’u japin vëzhguesve tanë procesverbalet mbyllëse të votimeve.
– Në disa prej Qendrave të Votimit është konstatuar masivisht mosngjyrosja e gishtit me bojë, siç e kërkon procedura ligjore.
Për të gjitha këto parregullsi vëzhguesit tanë kanë mbajtur raporte të detajuara që do t’u dërgohen Komisionit Qendror të Zgjedhjeve, komisionerëve të OSBE, si dhe institucioneve të tjera.
Të gjitha votat që qytetarët e Tiranës ia kanë besuar Lëvizjes BASHKË do të numërohen dhe do të mbrohen nga qindra vëzhguesit tanë të shpërndarë nëpër të gjitha qendrat e numërimit.
