Dibra është kthyer në qarkun ku kandidatët e opozitës kanë denoncuar disa shkelje zgjedhore, teksa mbrëmjen e djeshme u kapën në flagrancë tre pjesëtarë të stafit të zv/kryeministres Belinda Balluku, duke shpërndarë para për vota në një pallat në Peshkopi.
Presionet, shantazhi dhe makinacione të ndryshme janë përdorur nga kandidatët e Edi Ramës për të detyruar qytetarët që të votojnë pro tyre dhe rasti më i freskët vjen nga Bulqiza.
Teksa, e gjithë administrata e PS është shpërndarë në terren dhe në mënyrë agresive kërkojnë vota duke shkelur edhe Kodin Zgjedhor që parashikonte heshtje zgjedhore ditën e sotme, në Bulqizë tagrin e shantazhuesit e ka marrë drejtori i Agjencisë së Sigurimeve Shoqërore.
Klodian Reçi është akuzuar nga një e moshuar, e identifikuar si shtetësja Gjyle Krosi se i ka marrë kartën e identitetit dhe e ka kërcënuar me shembjen e shtëpisë nëse nuk voton për PS.
“Ma kanë marrë kartën. Kur të vish te votat do të jap lek, më tha. Quhet Klodi, djali i Bilbil Reçit. I thashë që karta më duhet, por kur të vish te votat do të ta jap, tha. Ma shembin këtë (shtëpinë)“, dëgjohet të thotë e moshuara në një video të publikuar nga SyriTV.
