Në një rast të paprecedentë, një kandidat për kryebashkiak do ta presë rezultatin e zgjedhjeve në qelinë e burgut.
Gjyqtarja e Vlorës Dorina Stroka e vlerësoi të ligjshëm arrestimin e Fredi Belerit, kandidatit të opozitës për bashkinë e Himarës në lokalet që zhvillohen ditën e nesërme (e diel) dhe caktoi ndaj tij masën e sigurisë “arrest me burg”. Po ashtu, gjyqtarja shpalli moskompetencën për gjykimin e akuzave dhe vendosi kalimin e çështjes në SPAK.
Fredi Beleri edhe Pandeli Kokaveshi, pjesëtar i stafit elektoral të tij, akuzohen për veprën penale “Korrupsion aktiv në zgjedhje”, kryer në bashkëpunim. Sipas hetimeve nga prokurorja Matilda Peza, Fredi Beleri dhe Pandeli Kokaveshi kanë premtuar para për vota si dhe i kanë dhënë 40 000 lekë të reja një të infiltruari nga policia për blerje votash.
Kokaveshi ndodhet në QSUT pas problemeve shëndetësore të shfaqura dhe më vonë gjatë ditës, pritet ti komunikohet masa e sigurisë në spital.
Avokati: Arrestimi i paligjshëm, si në diktaturë
Avokati i Belerit, Geni Gjyzari, në një prononcim për gazetarët pas seancës e cilësoi arrestimin pa prova dhe politik.
Sipas tij, prokuroria s’mundi të provojë akuzat në gjykatë.
“Ishin veprime të policisë si në kohën e komunizmit. Akuzë politike dhe montim politik. S’u provuan në asnjë moment akuzat, as ekzistenca e listave, ishte duke dalë jashtë lokalit dhe mënyra e rrëmbimit konsistoi që ti gjente ndonjë gjë në flagrancë. U provua që si gjetën gjë. Nga gjykata prisnim që ta deklaronte arrestin të paligjshëm. Ja kërkuam gjykatës duke qenë se nuk ekzistonin kushtet. Ligji parashikon që aktet shkojnë në SPAK brenda 10 ditëve. Ndoshta SPAK do ta vlerësojë të paligjshëm (arrestin)”, tha avokati, i cili shtoi se Beleri do të niset drejt Tiranës në pritje të një vendimi të dytë nga GJKKO.
Ai shprehu bindjen se arrestimi i Belerit nuk do të ndikojë në rezultatin e zgjedhjeve.
Një qëndrim të ngjashëm mbajti dhe kreu i PBDNJ-së Vangjel Dule.
“Jeni dëshmitar të një procesi parodi në të gjitha fazat dhe etapat e tij. Është një proces i projektuar, motivuar edhe i ekzekutuar drejpërsëdrejti nën urdhrat dhe porositë e Edi Ramës. rezultati tashmë dihet. Pengmarrja e zotit Beleri vazhdon. Por askush nuk duhet të ketë as më të voglin iluzion. Ndërsa Edi Rama vazhdon ta mbajë atë peng, do ta lirojë në mënyrë triumfale vota e nesërme e himarjotëve, nga Palasa në Qeparo dhe nga lumi i Vlorës në Himarë”, tha Dule për gazetarët.
Dyshimet për arrestim politik
Kandidati për Himarën u vu në pranga jashtë lokalit të tij orët e para të së premtes, vetëm dy ditë para zgjedhjeve lokale.
Sulmet e ashpra ndaj tij nga kryeministri Edi Rama ditët e fundit kanë ngritur dyshime se arrestimi ka prapavijë politike. Këtë qëndrim mbajti opozita që e quajti ndalimin e kandidatit një rrëmbim dhe hakmarrje të Ramës.
Mënyra sesi policia dhe prokuroria e Vlorës kanë vepruar procedurialisht e përforcon akoma më shumë këtë dyshim. Që policia dhe prokuroria mbeten të kapura nga Rama krijohet dyshime dhe nga qasja që këto dy institucione kanë pasur ndaj akuzave të shumta të opozitës për blerje votash. Pavarësisht denoncimeve me prova për shit-blerje votash, në asnjë rast, këto organe nuk kanë ngritur akuza penale ndaj kandidatëve të PS-së apo mbështetësve të tyre.
Një reagim të fortë ka pasur edhe nga Athina zyrtare. Kryediplomati grek tha se arrestimi i përfaqësuesit të minoritetit grek nga autoritetet në Shqipëri do të përbëjë një skandal nëse është bërë pa prova.
Kryeministri grek kërkoi lirimin e Belerit, duke paralajmëruar se Greqia mund të kthehet në pengesë në procesin e integrimit për Shqipërinë.
Ndërkohë, ambasadorja greke në vendin tonë ishte e pranishme në gjykatë këtë të shtunë.
