Arrestimi e më pas vendimi i Gjykatës së Vlorës për të lënë në burg pak orë para zgjedhjeve, kandidatin e koalicionit opozitar për bashkinë e Himarës, Fredi Beleri, sipas politologut Ilir Kalemaj është bërë për të zhvendosur vëmendjen nga rezultati.
Kalemaj teksa komentoi çështjen “Beleri” dhe arrestimin për shitblejre votash, tha për MCN TV se gjithçka ndodhi pas fjalorit të Ramës ndaj kandidatit të “Bashkë Fitojmë” që ishte shumë acidik, por në fund sipas tij është drejtësia ajo që do hetojë dhe do zbardhë të vërtetën.
“Ka disa këndvështrime e para është një gjuhë shumë acidike e kryeministrit që u përcoll live dhe pas asaj menjëherë pamë një aksion blic. Ose kjo është në një formë që Rama të krijojë njëlloj për shkak se sondazhet e nxirrnin keq në atë bashki, ose kjo bëhet që duke e vendosur vëmendjen në Himarë dhe duke e ditur rezultatin e gjithë kësaj dhe ti të zhvendosësh vëmendjen nga pjesa tjetër e territorit dhe të bësh gjëmën me shitblerjen e votës”, tha Kalemaj.
Sipas analistit gjasat janë që blerja e votës si fenomen të ketë më shumë protagonistë nga ata që janë në pushtet.
Duke iu referuar rasteve të fundit, si ai i Dibrës ku Prokuroria nxori “pa lagur” një punonjës të IKMT dhe dy kolege të tij, pjesë të stafit të zv/kryeministres Belinda Ballku, Kalemaj tha se ngrenë dyshime për standarte të dyfishta nga drejtësia.
“Votat nuk blihen vetëm me tasa ushqimesh, por me forma nga më të ndryshmet dhe këtë mundësi më të madhe e ka ai që është në pushtet. Mendoj se prokuroria dhe SPAK po punojnë me standarde të dyfishta, megjithatë është drejtësia që do hetojë dhe do ketë fjalën e fundit”, theksoi ai.
