Partia Demokratike e Sarandës ka denoncuar se një investitor strategjik do ti marrë qytetarëve të Ksamilit hapësirën publike në zonën e quajtur ”Baxho”.
Kryetarja e degës Manjola Nikollo, në një deklaratë për mediat, tha se çdo minutë, çdo orë e çdo ditë që po kalon, Ksamili po bie në duart e mafies e oligarkisë të veshur me pushtet politik.
“Një tjetër projekt për investim strategjik do t’i rrëmbejë ksamilioteve siperfaqje të madhe toke në zonen e quajtur ‘Baxho’. Sipërfaqja e projektuar për të kaluar në favor të privatit tashmë po i nënshtrohet projektit arkitekturor dhe ashtu si hyrja e Ksamilit, edhe kjo zonë do i nënshtrohet vendimit me firmë qeverie për tu bërë kompleks turistik. Të gjithë janë në dijeni te kësaj, por qytetaret e thjeshtë heshtin sepse askush nuk i dëgjon më, askush nuk i përkrah më”, tha ajo.
“Ashtu siç mbijnë çdo orë e çdo ditë në Ksamil kioskat e ndërtimet pa leje me bekimin e strukturave lokale duke zaptuar çdo sipërfaqje publike të mbetur bosh, ashtu po firmosen edhe projektet e mëdha qe nuk marrin vetëm publiken, por edhe djersen e mundin shumëvjeçar të banorëve të ndershëm të Ksamilit. Jemi në emergjencë kombëtare por sidomos lokale nga këta zaptues pronash që nesër do na hyjnë edhe në banesa. Qytetarë, ngrihuni në këmbë e reagoni me vote në 14 Maj”, shtoi.
